40 ارب روپے ڈویلپمنٹ منصوبوں پر خرچ کئے جارہے ہیں، کوشش ہے زیادہ تر رقم تعلیم اور صحت پر خرچ کی جائے، وزیر اعلی بلوچستان

جمعرات 26 جون 2014 17:32

کوئٹہ ( اُردو پوائنٹ اخبار تازہ ترین۔26جون۔2014ء) وزیراعلیٰ بلوچستان ڈاکٹر عبدالمالک بلوچ نے کہا ہے کہ اس وقت 40ارب روپے ڈویلپمنٹ منصوبوں پر خرچ کئے جارہے ہیں ہماری کوشش ہے کہ ہم زیادہ تر تعلیم اور صحت پر رقم خرچ کریں ۔انہوں نے یہ بات جمعرات کو صوبائی اسمبلی کے اجلاس کے دوران اس وقت کہی جب اے این پی کے پارلیمانی لیڈر انجینئر زمرک خان نے پوائنٹ آف آرڈر پر تقریر کرتے ہوئے کہاکہ جناب اسپیکر اسمبلی کے باہر فارماسسٹس کے ارکان احتجاج کررہے ہیں ۔

کسی رکن کو بھیجا جائے کہ ان کے مطالبات سنے جاسکے اس موقع پر صوبائی وزیر صحت رحمت بلوچ نے کہاکہ میں نے فارماسسٹس کے عہدیداروں سمیت دیگر ملازمین جنہوں نے احتجاجی جلسے جلوس کئے تھے کہا تھا کہ بجٹ کے بعد آپ سے بیٹھ کر ان مسئلوں پر بات کرینگے اب معلوم نہیں کہ انہوں نے دوبارہ اسمبلی کے باہر احتجاج کرنے کا فیصلہ کیوں کیا وزیراعلیٰ بلوچستان نے کہاکہ میں نے فارماسسٹ اور دیگر ہڑتالی ملازمین سے کہاہے کہ وہ سیکرٹری ایس اینڈ جی اے ڈی اور سیکرٹری فنانس سے ملاقات کرے ۔

(جاری ہے)

تاکہ مسئلے کو حل کیا جاسکے وزیراعلیٰ بلوچستان نے کہاکہ اگر ہم اسی طرح غیر ترقیاتی منصوبوں پر رقم خرچ کرتے رہے تو ہمارے پاس کچھ نہیں بچھے گا ہم ان کے جائز مطالبات کو حل کرنے کیلئے کوششیں کررہے ہیں تاکہ ان کے مسئلے حل ہوں مگر اس کیلئے سیکرٹری فنانس سے مل بیٹھ کر مسئلے کو حل کرنا ہوگا ۔