کراچی، سماجی خدمت عین عبادت ہے، تھیلیسیماکے مریض خصوصی توجہ کے طالب ہیں،حاجی محمد حنیف طیب

کراچی (اُردو پوائنٹ اخبار تازہ ترین۔4اگست۔2014ء) سوشل اسٹوڈنٹ فورم کے زیر اہتمام 28 ویں سالانہ ہفتہ عیادت کے چوتھے دن سول ہسپتال نیورولوجی ڈپارٹمنٹ میں مریضوں کی عیادت کرتے ہوئے سابق وفاقی وزیر مذہبی امور حاجی حنیف طیب نے کہا کہ سماجی خدمت عین عبادت ہے۔ سوشل اسٹوڈنٹ فورم کے عہددار اور ممبران مبارک باد کے مستحق ہیں کہ وہ سنت نبوی پر عمل پیرا ہوتے ہیں۔

مریضوں کی عیادت عید کے ایام میں کرتے ہیں۔ اس موقع پر فورم کے چیئرمین نفیس احمد خان، سلیم احمد، شبیر دانش، ڈاکٹر رفیع، سید شائق ، حنا اعظم، احسن خان اور دیگر ممبران موجود تھے ۔ عید کے پانچوں دن افضال تھیلیسیماں سینٹر فیڈرل بی ایریا میں ہفتہ عیادت کے سلسلے میں فورم کے وفد کے ساتھ کیپٹن ضیاء عالم بحیثیت مہمان خصوصی شریک ہوئے ۔

(جاری ہے)

اس موقع پر انہوں نے تھیلیسیماں کے مریض بچوں کی عیادت کی اور ان میں تحائف تقسیم کیئے۔

اپنے خصوصی خطاب میں انہوں نے کہا کہ تھیلیسیماکے مریض خصوصی توجہ کے طالب ہیں اور یہاں آکر میں نے جو مشاہدہ کیا ہے اس سے بہت زیادہ متاثر ہوا ہوں کہ افضال تھیلیسیماں سینٹر جس طرح ان معصوم پھولوں کی آبیاری کررہا ہے وہ لائق تحسین ہے۔ ہفتہ عیادت کے سلسلے کے چھٹے دن معروف سماجی شخصیت پروفیسر اعجاز فاروقی نے فورم کے ممبران کے ساتھ المصطفےٰ میڈیکل سینٹر گلشن اقبال میں مریضوں کی عیادت کی اور عید کی مٹھائی تقسیم کی۔

انہوں نے المصطفےٰ ٹرسٹ کی کاوشوں کو سراہتے ہوئے کہا کہ مجھے خوشی ہے کہ لوگوں کے دکھوں کا مداوا کرنے کا عزم جس احسن انداز میں پورا کیا جارہا ہے وہ قابل تقلید اور ستائش ہے ۔ مریضوں کے عیادت خوشی کے موقع پر قابل تقلید عمل ہے ۔ انہوں نے ٹرسٹ کو اپنی جانب سے فورم کے پلیٹ فارم سے نقد عطیہ کی رقم بھی دی جس کا ٹرسٹ کے ذمہ داروں نے شکریہ ادا کیا۔ اس موقع پر احمد رضا طیب، امین آدم جی، معین احمد ، ندیم شاہ اور دیگر موجود تھے۔