کمپنی اپنے وسائل کے اندر رہتے ہوئے کارکنوں کی فلاح و بہبود اور انکے جائز مطالبات کا حل کرے گی،چیف ایگزیکٹو فیسکو،

فیصل آباد (اُردو پوائنٹ اخبار تازہ ترین۔15ستمبر 2014ء) قائمقام چیف ایگزیکٹو فیسکوسید ظفر عباس بخاری نے کہا کہ کمپنی اپنے وسائل کے اندر رہتے ہوئے کارکنوں کی فلاح و بہبود اور انکے جائز مطالبات کا حل کرے گی۔ 66کنٹریکٹ ملازمین کو ریگولر کر دیا گیا ہے جبکہ دوران ملازمت فوت ہونے والے ملازمین کے بیس بچوں کو ملازمت دی گئی ہے ۔بجلی کی لائنوں پر کام کرنے والے سٹاف کو مہلک حادثات سے بچانا کمپنی کی اولین ترجیحات میں شامل ہے۔

آئندہ سے ٹی اینڈ پی کے بغیر دفتر آنے والے لائن مین کو غیر حاضر تصور کیا جائے گا اور بغیر حفاظتی آلات کے کام کرنے والوں کے خلاف سخت ایکشن ہو گا وہ فیسکو ہیڈکوارٹر میں منعقدہ انتظامیہ اور سی بی اے یونین کے اجلاس سے خطاب کر رہے تھے ۔ انھوں نے مزید کہا کہ فیسکو انتطامیہ،ملازمین اور سی بی اے یونین کی مشترکہ کاکوشوں سے فیسکو نے ملک بھر کی تقسیم کار کمپنیوں میں پہلی پوزیشن حاصل کی ۔

(جاری ہے)

اب اسے برقرار رکھنے کے لیے مزید محنت کرنا ہو گی۔کمپنی کو یہ مقام دلانے میں کام کرتے ہوئے شہید ہونے والے کارکنوں کا حصہ بھی ہے۔ چیف ایگزیکٹو نے ریٹائر ہونے والے ملازمین کو ان کی ریٹائرمنٹ کے دن ہی واجبات کے چیکس دینے کی تقریب منعقد کرنے کے احکامات دیئے اورکہا کہ بجلی کی لائنوں پر کام کرتے ہوئے جام شہادت نوش کرنے والے کارکنوں کے بچوں کو کمپنی میں ملازمت دی جائے گی۔

انھوں نے انتظامیہ کو ہدایت کی کہ وہ لائنوں پر کام کرتے ہوئے شہید ہونے والے کارکنوں کی تصویریں اور ان کی خدمات کو ہر سب ڈویژن میں نمایان طور پر آویزاں کریں۔چیف ایگزیکٹو نے مزید کہا کہ انھوں نے حادثات کی بڑھتی ہوئی شرح پر اظہار تشویش کیا ،انھوں نے کہا کہ لائن سپرنٹنڈنٹس ہمہ وقت صارفین کو بجلی کی بلاتعطل فراہمی کیلئے گرڈسٹیشن ،لائن سٹاف ،ایس ڈی او اور ایکسئین حضرات سے رابطے میں رہتے ہیں یوں ان کا موبائل فون کا بل کافی زیادہ ہوتا ہے فیسکو دیگر کمپنیوں کی طرح اپنے لائن سپرنٹنڈنٹس کو 500روپے ماہانہ موبائل الاؤنس دے۔

جس پر چیف ایگزیکٹو نے انتظامیہ کو ہدایت کہ وہ اس بارے میں مفصل رپورٹ پیش کرے اور بورڈ کی منظوری کے بعد اس پر عمل درآمد کیا جائے گا۔ اجلاس میں فنانس ڈائریکٹر محمد اقبال غوری ، ڈائریکٹر ایچ آر اینڈ اے احسان صدیقی، منیجر ایچ آراینڈ ایڈمن محمد علی، منیجر ایل اینڈ ایل نصر حیات میکن اور دیگر افسران نے شرکت کی.