سندھ اور بلوچستان میں بچوں کو پولیو سے بچاؤ کیلئے سہ روز ہ مہم شروع

پیر 29 ستمبر 2014 12:54

کراچی / کوئٹہ(اُردو پوائنٹ اخبار تازہ ترین۔29ستمبر۔2014ء) سندھ اور بلوچستان کی صوبائی حکومتوں نے ایک کروڑ 24 لاکھ بچوں کو پولیو سے بچاوٴ کیلئے سہ روزہ ویکسی نیشن مہم شروع کردی ہے۔

(جاری ہے)

ڈائریکٹر میڈیکل سروسز سندھ ظفراعجاز کے مطابق سندھ بھر میں 3 روزہ انسداد پولیو مہم شروع ہوگئی ہے جس کے تحت 5 سال سے کم عمر ایک کروڑ 10 لاکھ سے زائد بچوں کو اس موذی مرض سے بچاوٴ کیلئے خصوصی ویکسین دی جارہی ہے ‘مہم کے تحت کراچی میں 22 لاکھ سے زائد جبکہ سندھ کے دیگر اضلاع میں 88 لاکھ سے زائد بچوں کو انسداد پولیو کے قطرے پلائے جائیں گے۔

سندھ کی طرح بلوچستان میں بھی انسداد پولیو کی 3روزہ مہم شروع کردی گئی ہے جس کے تحت قلعہ عبداللہ اور پشین کے علاوہ 27 اضلاع میں 14 لاکھ 35 ہزار سے زائد بچوں کو پولیو سے بچاوٴ کے قطرے پلائے جائیں گے، ان دونوں اضلاع میں ویکسی نیشن مہم اکتوبر کیوسط میں چلائی جائے گی ۔ انسداد پولیو مہم کے دوران 6 ماہ سے زائد بچوں کو وٹامن اے کے قطرے بھی پلائے جائیں گے۔