ایم کیو ایم نے متوسط طبقے کے لوگوں کو قومی ، صوبائی وسینیٹ کے ایوانوں میں جاگیرداروں، سرمایہ داروں کے برابر بٹھایا، محمد طاہر کھوکھر استحصالی قوتیں ‘ موروثی سیاستدان اور عوام دشمن عناصر غریبوں سے اُٹھنے والی سیاسی ، شعور و فکر کی لہر،آوازکی گونج کو ختم کرنا چاہتے ہیں، وزیر ٹرانسپورٹ آزاد کشمیر

جمعہ 10 اکتوبر 2014 17:12

مظفر آباد(اُردو پوائنٹ اخبارتاز ترین ۔0 1اکتوبر 2014ء) ایم کیو ایم آزادکشمیر کے پارلیمانی لیڈر ‘ جوائنٹ انچارج صوبائی تنظیمی کمیٹی ‘ وزیرٹرانسپورٹ و کوآپریٹو محمد طاہرکھوکھرنے کہا ہے کہ ایم کیوایم واحدجماعت ہے جس نے غریب متوسط طبقے کے لوگوں کو قومی صوبائی اور سینیٹ کے ایوانوں میں جاگیرداروں، سر مایہ داروں کے برابر میں بٹھا یا‘ استحصالی قوتیں ‘ موروثی سیاستدان اور عوام دشمن عناصرچاہتے ہیں کہ پاکستان میں غریبوں میں سے اُٹھنے والی سیاسی ، شعور و فکر کی لہر،آوازکی گونج کو ختم کرایا جائے اور اس آواز کو بند کردیا جائے یہی وجہ ہے کہ ایم کیو ایم کے خلاف ہر طرف سے پروپیگنڈا اور سازشوں کی یلغار ہے لیکن وہ دن دور نہیں جب ملک کے چپے چپے میں حق پرستی کا نعرہ گونجے گا اورعوام حق حکمرانی حاصل کرتے ہوئے اپنی تقدیر اور مستقبل کے فیصلے خود کیاکریں گے چند خاندانوں ‘ وڈیروں ‘ سرمایہ داروں کے اقتدار کا سورج غروب ہونے کو ہے - یہاں کارکنان اور عوام کے مختلف وفود سے گفتگو کرتے ہوئے طاہرکھوکھر نے کہا کہ ایم کیوایم کاگراف اوپرسے اوپربڑھ گیاہے اورکراچی سے خیبرپختونخوااورآزاد کشمیرسمیت گلگت بلتستان میں اس کی مقبولیت میں دن بہ دن اضافہ ہواہے-انہوں نے کہا کہ کچھ عناصرکی یہ برسوں سے خواہش رہی ہے کہ ایم کیو ایم ختم یاٹکڑے ٹکڑے ہوجائے ، ایم کیوایم کی چھتیس سا لہ تاریخ میں متعدد مرتبہ طاقتور اداروں ، اسٹبلشمنٹ اورمختلف سیاسی و مذہبی جماعتوں اور مخالفین نے طرح طرح کے ہتھکنڈے استعمال کیے کہ کسی طریقے سے پاکستان میں غریبوں میں سے اُٹھنے والی سیاسی ، شعور و فکر کی لہر،آوازکی گونج نے جو جنم لیا ہے اس گونج کو ختم کرایا جائے اور اس آواز کو بند کردیا جائے نہ جتنی شدت سے تحریک کو دبانے کی کوشش کی گئی اتنی ہی مضبوطی سے یہ تحریک ابھرتی رہی اور آج چاروں صوبوں ‘ آزادکشمیر اور گلگت بلتستان کے لوگ ایم کیو ایم اور قائد تحریک الطاف حسین بھائی کو اپنا نجات دہندہ سمجھتے ہیں - انہوں نے کہا کہ پاکستان جن مقاصد کے حصول کیلئے بنایا گیا تھا ان کے نام پر گزشتہ ساٹھ سالوں سے اٹھارہ کروڑ عوام کو سہانے سپنے دکھا کر چند سو خاندان ملک کے وسائل لوٹ رہے ہیں اور عوام کا خون چوس رہے ہیں - سٹیٹس کو کی حامی سیاسی جماعتیں‘ موروثی سیاست دان ‘ جاگیردار ‘ وڈیرے اور صنعت کار کبھی عوام کو ان کے حقوق نہیں دیں گے صرف ایم کیو ایم ہی وہ سیاسی تحریک ہے جو قائد اعظم کے خوابوں کے مطابق پاکستان کانظام چلانے کی صلاحیت رکھتی ہے جہاں قانون امیر اور غریب سب کیلئے برابر‘ روٹی ‘ کپڑا اور مکان کی فراہمی حکومت کی ذمہ داری ‘ ملکی وسائل کی برابری کی بنیاد پر تقسیم ہو گی- طاہرکھوکھر نے کہا کہ ایم کیو ایم تمام سازشوں اور پروپیگنڈا کے باوجود اپنی پرامن جدوجہد جاری رکھی گی وہ وقت دور نہیں جب ملک بھر کے غریب ‘ محکوم ‘ بے بس اور مظلوم عوام ایم کیو ایم جھنڈے تلے جمع ہو کر اپنے حقوق کیلئے متفقہ آواز بلند کریں گے اور اقتدار کے ایوانوں میں وڈیروں ‘ جاگیرداروں اور حکمرانوں کی اولادوں کے بجائے غریب عوام کے نمائندے بیٹھ کر حقیقی فلاحی معاشرہ قائم کریں گے۔