تحریک انصاف کے وفد نے سروسز ہسپتال میں زخمیوں کی عیادت اور انکی جلد صحت یابی کی دعا کی

پیر 3 نومبر 2014 19:55

لاہور(اُردو پوائنٹ اخبار تازہ ترین۔3 نومبر 2014ء) تحریک انصاف لاہور کے وفد ضلعی صدر عبدالعلیم خان کی قیادت میں سروسز ہسپتال کا دورہ کیا۔ اور سانحہ واہگہ بارڈر کے زخمیوں کی عیادت کی انہوں نے زیر علاج مریضوں سے انکی صحت کے متعلق دریافت کیا اور انکی جلد صحت یابی کی دعا کی۔اور عمران خان کی طرف سے انکے لئے نیک خواہشات کا پیغام پہنچایا۔ اس موقع پر میڈیا سے گفتگو کرتے ہوئے عبدالعلیم خان نے کہا کہ ہم کسی بھی قسم کی دہشت گردی کی مذمت کرتے ہیں۔

(جاری ہے)

لیکن اگر حکومتی ادارے اپنے فرائض کی انجام دہی میں غفلت نہ کرتے تو اس افسوس ناک واقعہ سے بچا جا سکتا تھا۔انہوں نے کہا کہ وفاقی وزیر داخلہ کا بیان پنجاب حکومت کی ناکامی ثابت کرنے کیلئے کافی ہے۔اگر دہشت گردی کے بارے قبل از وقت بتا دیا گیا تھا تو بروقت اقدامات کیوں نہیں اُٹھائے گئے عبدالعلیم خان نے کہا کہ بالخصوص افواج پاکستان کی دہشت گردوں کے خلاف جنگ اور عاشورہ کے تناظر میں واہگہ بارڈر کا سانحہ مزید قابل تشویش ہے۔ ممبر صوبائی اسمبلی میاں اسلم اقبال ، میاں حامد معراج ، میاں محمد افتخار، فرخ جاوید مون، شیخ عامر ، نوشین حامد معراج،یامین ٹیپو، کرنل شوکت، راشد ریاض، عبیدالرحمن ، جنید رزاق اور فود بھلر بھی اس موقع پر موجود تھے۔