جائیکا اور یونیسیف نے بچوں کو پولیو سے محفوظ رکھنے کیلئے معاہدے پر دستخط کر دیئے

پیر 17 نومبر 2014 16:37

اسلام آباد (اُردو پوائنٹ تاز ترین اخبار۔ 17نومبر 2014ء) جاپانی ترقیاتی ادارہ ( جائیکا) اور بچوں کیلئے اقوام متحدہ کے فنڈ یونیسف نے پاکستان میں بچوں کو پولیو سے محفوظ رکھنے کے لئے معاہدے پر دستخط کردیئے ‘ نیشنل ہیلتھ سروسز کے جائنٹ سیکرٹری عامر شیخ نے حکومت پاکستان کی جانب سے دستخط کی تقریب میں شرکت کی۔ یونیسف کے لئے جاپان کی تعاون سے اورل پولیو ویکسین کی 15 ملین ڈوزیز خریدی جائیں گی ۔

فاٹا اور کراچی کے ہائی رسک ایریاز میں بچوں کے لئے ویکسین کی 13 ملین خوراکیں فراہم کی جائیں گی۔ وفاقی سطح پر کے پی کے، بلوچستان اور فاٹا کے علاقوں میں انسداد پولیو مہم کے دوران ویکسین کو محفوظ رکھنے کے لئے 100 سولر ریفریجریٹرز ‘ جنریٹرز اور درجہ حرارت کی مانیٹرنگ کرنے والا نظام بھی مہیا کیا جائے گا۔

(جاری ہے)

جاپان کے سفیر ہیروشی انو ماتا نے پاکستان کو پولیو کی بیماری سے محفوظ رکھنے میں مدد کے لئے حکومت جاپان کے پختہ عزم کا اظہار کیا۔

انہوں نے کہا کہ جاپان 1996ء سے انسداد پولیو کے لئے مدد دے رہا ہے اور اس سلسلے میں15 ارب 20 روپے کی امداد دے چکے ہیں ۔ انہوں نے پاکستا میں پولیو کے بڑھتے ہوئے کیسز کے پیش نظر حکومت پاکستان اور شراکت داروں پر زور دیا کہ وہ پولیو کے خلاف مہم کے لئے اپنی کوششیں تیز کریں۔