جھنگ،محکمہ صحت کی جانب سے ماں و بچے کی صحت کا ہفتہ شروع ہو گیا

جھنگ(اُردو پوائنٹ تاز ترین اخبار۔ 18نومبر 2014ء)حکومتی ہدایات کی روشنی میں محکمہ صحت ضلع جھنگ کی جانب سے ماں و بچے کی صحت کا ہفتہ شروع ہو گیاہے جس میں ضلع جھنگ کی84یونین کونسلز کی 24لاکھ آبادی کو فوکس کرلیاگیاہے نیز دیہی علاقوں کی 19لاکھ سے زائد آبادی کیلئے بھی خصوصی اقدامات جاری ہیں کیونکہ ماں اور بچے کا صحت مند ہونا دراصل معاشرہ کا صحت مند ہونا ہے یہی وجہ ہے کہ محکمہ صحت پنجاب ماں اور بچت کی صحت کے حوالے سے خصوصی ہیلتھ پروگرامز کے ذریعے انقلابی بہتری لا رہی ہے اور اس تناظر میں ماں اور بچے کی صحت کے حوالہ سے خصوصی ہفتہ منایا جا رہا ہے جو22نومبرتک جاری رہے گا۔

ڈسٹرکٹ کوآرڈینٹر آئی آر ایم این سی ایچ پروگرام جھنگ ڈاکٹر ذولفقار علی نے ڈسٹرکٹ ہیڈ کوارٹر ہسپتال جھنگ میں بچوں کو حفاظتی قطرے پلانے اور پیٹ کے کیڑوں سے بچاؤ کی چوسنے والی گولیاں کھلاکر ماں اور بچے کی صحت کے ہفتہ کا آغاز کیا۔

(جاری ہے)

اس موقع پر پروگرام ڈائریکٹر ڈسٹرکٹ ہیلتھ ڈویلپمنٹ سنٹر ڈاکٹر عبدالغنی شیخ، ایم ایس ڈی ایچ کیو ہسپتال ڈاکٹر ممتاز سیال بھی موجود تھے۔

ڈاکٹر ذوالفقار علی نے بتایا کہ اس خصوصی ہیلتھ پروگرام کو کامیاب بنانے کیلئے نیشنل پروگرام کی 48لیڈی ہیلتھ سپر وائزرز،1320لیڈی ہیلتھ ورکرز جبکہ ایم این سی ایچ پروگرام کی 51کمیونٹی مڈ وائف ،95ویکسی نیٹرفیلڈ ڈیوٹی سرانجام دے رہے ہیں ۔ انہوں نے بتایا کہ اس خصوصی مہم کو کامیاب بنانے کیلئے فیلڈ ٹیموں کو پیٹ کے کیٹرے ختم کرنے کی92640 گولیاں،1371ڈی وارمنگ شیٹس،7800معلوماتی پمفلٹس،255کپڑے کے بینرز اور 4113اے این سی کارڈز فراہم کئے گئے ہیں۔

اس موقع پر پروگرام ڈائریکٹر ڈسٹرکٹ ہیلتھ ڈویلپمنٹ سنٹر جھنگ ڈاکٹر عبدالغنی شیخ نے بتایا کہ ماں اور بچے کی صحت کا ہفتہ منانے پر تعینات عملہ کو دو سے پانچ سال تک کی عمر کے بچوں کوپیٹ کے کیڑوں سے بچاؤ،ٹی ٹی ویکسی نیشن ،حاملہ خواتین کو زچگی کے دوران حفاظتی تدابیراختیار کرنے اور دیگر ضروری تربیت مکمل کی جا چکی ہے تاکہ وہ زیادہ موٴثر طریقے سے اپنی ڈیوٹی سرانجام دیں سکیں جبکہ انہیں آگاہی میٹریل بھی فراہم کیا گیا ہے جو سکولوں، مساجد کے باہر اور دیگر عوامی اجتماعات کے مقامات پر آویزاں کیا گیا ہے تاکہ عوام کی بھرپور شمولیت کو یقینی بنایا جاسکے۔

انہوں نے مزید بتایا کہ اس خصوصی مہم کی نگرانی ڈی سی اوجھنگ راجہ خرم شہزاد اور ای ڈی او ہیلتھ ڈاکٹر ظفر عباس خان بلوچ کر رہے ہیں جبکہ تمام ہسپتالوں ،رورل ہیلتھ سنٹروں اور بنیادی مراکزصحت کے انچارج ڈاکٹرز بھی اس مہم کی مانیٹرنگ کررہے ہیں۔