ملک بھر میں فرسودہ جاگیردارانہ نظام کیخلاف غریب ومتوسط طبقہ کی حکمرانی کا شعور تیزی سے فروغ پارہا ہے، الطاف حسین،

ایم کیوایم کے ذمہ داران اورکارکنان حق پرست شہداء کی لازوال قربانیوں کو ہمیشہ یاد رکھیں، دسمبریوم شہدائے حق کے موقع پر بیان

پیر 8 دسمبر 2014 22:53

لندن(اُردو پوائنٹ تاز ترین اخبار۔ 08 دسمبر 2014ء) متحدہ قومی موومنٹ کے قائد الطاف حسین نے کہاہے کہ حق پرست شہداء کی قربانیاں رائیگاں نہیں جائیں گی اور شہداء کے مقدس لہو کے صدقے، پاکستان میں غریب ومتوسط طبقہ کی حکمرانی کا انقلاب ضرور آئے گا۔ 9، دسمبر”یوم شہدائے حق “ کے موقع پر اپنے خصوصی بیان میں الطاف حسین نے تمام حق پرست شہداء کو زبردست خراج عقیدت پیش کرتے ہوئے کہاکہ حق پرست شہداء کے حق پرستی کی نظریہ ، مشن ، مقصد اور کاز کیلئے اپنی جانوں کا نذرانہ پیش کردیا لیکن کسی باطل قوت کے آگے سرجھکانا گوارا نہیں کیا، قوم کے بہتر مستقبل کیلئے اپنی قیمتی جانوں کے نذرانے پیش کرنے والے حق پرست شہداء ایم کیوایم کا قیمتی سرمایہ ہیں۔

الطاف حسین نے کہاکہ یہ حق پرست شہداء کی لازوال قربانیوں کا ثمر ہے کہ آج ایم کیوایم کا حق پرستانہ فکروفلسفہ آزادکشمیراور گلگت بلتستان سمیت پاکستان کے چپے چپے میں پھیل چکا ہے ، ملک بھر میں فرسودہ جاگیردارانہ نظام کے خلاف غریب ومتوسط طبقہ کی حکمرانی کا شعور تیزی سے فروغ پارہا ہے ۔

(جاری ہے)

انہوں نے کہاکہ انشاء اللہ حق پرست شہداء کی قربانیاں رائیگاں نہیں جائے گی اورہمیں کامل یقین ہے کہ بہت جلد شہداء کے مقدس لہو کے صدقے پاکستان میں غریب ومتوسط طبقہ کی حکمرانی کا انقلاب آئے گا، پاکستان میں خلق خدا راج کرے گی اور ملک سے ظلم وستم اور جبرواستبداد کا نظام ہمیشہ ہمیشہ کیلئے ختم ہوجائے گا۔

الطاف حسین نے ایم کیوایم کے تمام ذمہ داروں اورکارکنوں کوتلقین کی کہ وہ حق پرست شہداء کی لازوال قربانیوں کو ہمیشہ یاد رکھیں، جس مشن ومقصد کیلئے شہداء نے اپنی جانوں کے نذرانے پیش کیے اس مشن ومقصد کی تکمیل کیلئے کسی بھی قسم کی قربانی سے دریغ نہ کریں اور شہداء کے لواحقین کی بھرپورخبرگیری کریں۔ الطاف حسین نے دعا کی کہ اللہ تعالیٰ تمام شہداء کے درجات بلند فرمائے ، انہیں جنت الفردوس میں اعلیٰ ترین مقام عطا کرے اور شہداء کے لواحقین کوصبرجمیل عطا کرے ۔