وزیر اعلیٰ شہباز شریف کی ہدایت پر پنجاب انسٹی ٹیوٹ آف نیوروسائنسز کو جلد آپریشنل کیا جائے گا ‘ جواد رفیق ملک ،

لاہور(اُردو پوائنٹ تاز ترین اخبار۔ 09 دسمبر 2014ء ) سیکرٹری صحت پنجاب جواد رفیق ملک نے کہا ہے کہ وزیر اعلی محمد شہباز شریف کی ہدایت پر سٹیٹ آف دی آرٹ پنجاب انسٹی ٹیوٹ آف نیورو سائنسز کو آپریشنل کرنے کے لئے اضافی فنڈز فراہم کئے جائیں گے، انسٹی ٹیوٹ کو ایک خود مختار ادارے کے طو رپر چلایا جائے گا جس کے انتظامی امور کو چلانے کے لئے خود مختار بورڈ آف مینجمنٹ تشکیل دیا جائے گا ۔

انہوں نے یہ بات یہاں پنجاب انسٹی ٹیوٹ آف نیوروسائنسز کو فنکشنل کرنے کے سلسلہ میں اجلاس کی صدارت کرتے ہوئے کہی۔ اجلاس میں پرنسپل پوسٹ گریجوایٹ میڈیکل پی جی ایم آئی /امیر الدین میڈیکل کالج پروفیسر انجم حبیب وہرہ ، چیف پلاننگ آفیسر محکمہ صحت عبدالحق بھٹی، پروفیسر خالد محمود، محکمہ خزانہ اور پلاننگ اینڈ ڈویلپمنٹ ڈیپارٹمنٹ کے افسران نے شرکت کی۔

(جاری ہے)

اجلاس میں PINS کے بارے پروفیسر انجم حبیب وہرہ نے بریفنگ دیتے ہوئے بتایا کہ انسٹی ٹیوٹ آف نیورو سائنسز کی 10 منزلہ عمارت مکمل ہو چکی ہے اور انسٹی ٹیوٹ کے شعبہ ایمرجنسی کو جون 2015 ء تک آپریشنل کرنے کی منصوبہ بندی کی گئی ہے جس کیلئے 350 ملین روپے کی اضافی گرانٹ درکار ہے ۔ پروفیسر انجم حبیب وہرہ نے بتایا کہ اس وقت لاہور جنرل ہسپتال کے شعبہ نیوروسرجری میں سالانہ 5500 آپریشن کئے جاتے ہیں جبکہ آؤٹ ڈور میں روزانہ 300 اور ایمرجنسی میں اوسطا 100 مریضوں کو علاج معالجہ کی سہولیات فراہم کی جاتی ہیں۔

انہوں نے کہا کہ نئی انسٹی ٹیوٹ کے قیام سے دماغی امراض اور نیوروسرجری کے مریضوں کو بین الاقوامی معیار کی تشخیص و آپریشن کی سہولت میسر آئے گی۔ انہوں نے بتایا کہ یہ منصوبہ 2 مرحلوں میں مکمل ہو گا جس پر مجموعی لاگت کا تخمینہ 2745 ملین روپے ہے اور نظرثانی شدہ PC-1 پی اینڈڈی کو ارسال کر دیا گیا ہے ۔ پروفیسر آف نیوروسرجری ڈاکٹر خالد محمود نے بتایا کہ رواں سال 300 ملین روپے منصوبے کے لئے جاری ہو چکے ہیں اور بیڈز کے علاوہ 2 آپریشن تھیٹرز کیلئے آلات بھی آچکے ہیں ۔

سیکرٹری صحت جواد رفیق ملک نے کہا کہ محکمہ صحت انسٹی ٹیوٹ کے ایمرجنسی سروسز کے شعبہ کو جون 2015 ء تک آپریشنل کرنے کے لئے 350 ملین روپے کے اضافی فنڈز جلد فراہم کر ے گا ۔ انہوں نے پی جی ایم آئی او رامیر الدین میڈیکل کالج کے لئے لاہور جنرل ہسپتال میں بلڈنگ ٹاورز تعمیر کرنے کے سلسلہ میں ہدایت کی کہ دونوں منصوبوں کے لئے پی سی ون تیار کیا جائے۔ سیکرٹری صحت نے کہا کہ وزیر اعلی محمد شہباز شریف کی ہدایت پر بننے والے پنجاب انسٹی ٹیوٹ آف نیورو سائنسز کو جدید سہولیات سے اراستہ کیا جائے گا او ریہ ایک سپیشلسٹ انسٹیٹیوٹ ہو گا جو پی جی ایم آئی اور امیر الدین میڈیکل کالج کے طلباء کی تعلیمی و تربیتی سرگرمیوں میں بھی بہت ممدو معاون ثابت ہو گا ۔