پشاور واقعہ کے شہداء کی یاد میں متحدہ قومی موومنٹ حیدرآباد زون پر شمعیں اور چراغ روشن کئے گئے، شہداء کو زبردست خراج عقیدت پیش،

شہداء کے ایصال ثواب اور زخمیوں کی جلد صحت یابی کیلئے دعائیں

بدھ 17 دسمبر 2014 21:30

حیدرآباد(اُردو پوائنٹ اخبار تازہ ترین۔17دسمبر 2014ء) پشاور میں آرمی پبلک اسکول پر مسلح دہشت گردوں کے حملے میں شہید ہونے والے معصوم طلباء اور اساتذہ کرام کی یاد میں بدھ کی شب متحدہ قومی موومنٹ حیدرآباد زون پر شمعیں اور چراغ روشن کئے گئے اور شہداء کو زبردست خراج عقیدت پیش کیا گیا جبکہ شہداء کے ایصال ثواب اور زخمیوں کی جلد صحت یابی کیلئے دعائیں کی گئیں۔

سانحہ پشاور کے شہداء کی یاد میں منعقدہ تقریب میں ایم کیوایم سندھ تنظیمی کمیٹی اراکین عائشہ آفتاب ،فرزانہ ظفر ، حیدرآبا د زون کے زونل انچارج نوید شمسی و اراکین زونل کمیٹی حق پرست اراکین اسمبلی سید وسیم حسین ،راشد خلجی ،دلاور قریشی ،زبیراحمد خان ،صابر حسین قائم خانی سمیت علمائے کرام ،تاجر ، صنعتکار ، کالجز کے پروفیسرز ، اساتذہ کرام ، فنکاروں ، ادیبوں ، دانشوروں،معصوم بچے بچیوں ، خواتین، مختلف شعبہ ہائے زندگی سے تعلق رکھنے والے افراد کے علاوہ ایم کیوایم کے مختلف شعبہ جات کے اراکین ، سیکٹر و یونٹس کے ذمہ داران، کارکنان اور ہمدردوں نے بڑی تعداد میں شرکت کی اور شہداء کی یاد میں اپنے حصے کی شمع روشن کی ۔

(جاری ہے)

اس موقع پر فضا سوگوار تھی اور ایم کیوایم حیدرآباد زون کے اطراف کی گلیوں اور سڑکوں پر سانحہ پشاور کے سوگ میں سیاہ پرچم لہرائے گئے اور مذمتی بینرز آویزاں کئے گئے ۔ تقریب کے شرکاء نے سانحہ پشاورکو دہشت گردی کا بد ترین واقعہ قرار دیا اور شہداء کے سوگوار لواحقین سے مکمل دلی یکجہتی کااظہاربھی کیا ۔

متعلقہ عنوان :