پاکستان اور بھارت کے درمیان ثقافت و سیاحت سمیت مختلف شعبوں میں تعلقات کے فروغ کیلئے مذاکرات کا چوتھا مرحلہ شروع ، دو روزہ مذاکرات میں ثقافت، سیاحت، تعلیم، کھیل اور صحت سمیت مختلف شعبوں میں دونوں ممالک کے عوام کو قریب لانے کیلئے معاملات کا جائزہ لیا جا ئیگا

اسلام آباد (اردوپوائنٹ تازہ ترین اخبار28 جون 2007) پاکستان اور بھارت کے مابین مختلف شعبوں میں تعلقات کو بہتر بنانے کیلئے دو روزہ مذاکرات کا چوتھا مرحلہ شروع ہو گیا۔ مذاکرات میں پاکستان اور بھارت کی ثقافت کی وزارتوں کے سیکرٹری وفود قیادت کر رہے ہیں ثقافت، سیاحت، تعلیم، کھیل، صحت اور امور نوجوانان کے شعبوں میں دونوں ممالک کے عوام کو قریب لانے کیلئے معاملات کا جائزہ لیا جائیگا۔

تفصیلات کے مطابق ثقافت، سیاحت، تعلیم، کھیل، صحت اور امور نوجوانان سمیت مختلف شعبوں میں پاک بھارت عوام کو مزید قریب لانے اور حائل رکاوٹوں کو دور کرنے اور سہولیات کو بہتر بنانے کیلئے دو طرفہ مذاکرات کا چوتھا مرحلہ گزشتہ روز اسلام آباد میں شروع ہو گیا ہے پاکستان کی جانب سے سیکرٹری ثقافت سلیم گل شیخ جبکہ بھارت کی جانب سے انکے ہم منصب بادل کے داس وفد کی قیادت کر رہے ہیں۔

(جاری ہے)

سیکرٹری سلیم گل شیخ نے میڈیا کے نمائندوں کو بتایا کہ مذاکرات کا چوتھا مرحلہ شروع ہو گیا ہے جس میں سیاحوں اور زائرین کو ویزا اور دیگر سفری سہولیات پاک بھارت مشترکہ فلم سازی اور دو طرفہ نمائش مذکورہ شعبوں میں وفود کے تبادلوں، تعلیم کے میدان میں دو طرفہ تعاون، عوامی رابطوں میں درپیش رکاوٹوں اور مسائل پر بات ہو گی۔ جس کے مستقبل میں بہتر نتائج سامنے آئیں گے اور خطے میں امن حوالے سے بھارتی سیکرٹری ثقافت بادل کے داس نے کہا کہ ہم پر امید ہیں کہ مذاکرات سے دونوں ملکوں کے تعلقات کو فروغ دینے میں اہم پیش رفت ثابت ہونگے۔ وفود کے تبادل، دونوں ممالک کے عوام کے مابین رابطوں میں حائل رکاوٹوں اور مسائل کو دور کر کے بہتر تعلقات کو فروغ دیا جا سکتا ہے۔