پارٹی پر زبردستی مسلط ہونیوالے نظریاتی رہنماؤں اورکارکنوں کے تیور دیکھ کر اپنے مستقبل کا اندازہ لگا لیں ‘ سردار حر بخار ی

لاہور( اُردو پوائنٹ اخبارتاز ترین۔ 28دسمبر 2014ء)پاکستان پیپلزپارٹی کے رہنما سردار حر بخاری نے کہا کہ پارٹی پر زبردستی مسلط ہونے والے نظریاتی رہنماؤں اورکارکنوں کے تیور دیکھ کر اپنے مستقبل کا بخوبی اندازہ لگا سکتے ہیں ،پیپلز پارٹی کو اتنا نقصان آمریت کے دور میں نہیں پہنچا جتنا پیراشوٹ کے ذریعے آنے والوں نے پہنچایا ہے ۔گزشتہ روز مرکزی دفتر میں لاہور تنظیم کے کارکنوں سے خطاب کرتے ہوئے سردار حر بخاری نے کہا کہ بھٹو شہید اور بی بی شہید کے جیالوں کو پارٹی کی نظریاتی اساس کو بچانے کیلئے اپنا کردار ادا کرنا ہوگا اگراس میں مزید تاخیر کی گئی تو پھر پچھتاوے کے سوا کچھ نہیں بچے گا۔

انہوں نے کہا کہ بھٹو کے جیالے رہنما اور کارکن زبردستی مسلط ہونے والوں کو قبول کرنے کو تیار نہیں بلکہ ان کی پالیسیوں کے آگے بند باندھیں گے۔

(جاری ہے)

انہوں نے کہا کہ ایک سازش کے تحت پیپلز پارٹی کو ختم کرنے کی کوششیں جاری ہیں لیکن ہم بتانا چاہتے ہیں کہ پیپلز پارٹی کو ضیاء الحق کی آمریت کی طویل رات ختم نہیں کر سکی اور اب بھی ایسی سازشیں کرنے والے منہ کی کھائیں گے۔ انہوں نے کہاکہ پیپلز پارٹی کے نظریاتی کارکنوں نے اب پارٹی کا علم نہ سنبھالا تو بہت دیر ہو جائے گی اس لئے سب کو اپنے اپنے حصے کا کردار ادا کرنا ہوگا اور خاموش رہنے کی بجائے آواز بلند کرنا ہوگی ۔