ہمارا تین سالہ دور حکومت گزشتہ ساٹھ سالوں پر بھاری ہے‘وزیر جنگلات سردار جاوید ایوب،

تین سالہ کے عرصہ میں سڑکوں کی تعمیر،سکولوں کی تعمیر،صحت اور پینے کے صاف پانی کے کئی منصبوبے مکمل کیے

اتوار 11 جنوری 2015 14:50

مظفرآباد(اُردو پوائنٹ اخبارتاز ترین۔ 11جنوری 2015ء) آزادکشمیر کے وزیر جنگلات سردار جاوید ایوب نے کہا ہے کہ ہمارا تین سالہ دور حکومت گزشتہ ساٹھ سالوں پر بھاری ہے جس کی گواہی میرے حلقہ کے عوام دیں گے۔تعمیروترقی پیپلز پارٹی کی حکومت کا اولین ایجنڈا ہے۔گزشتہ ادوار میں ہونے والی ناانصافیوں اور محرمیوں کا ازالہ کرنے کے لیے دن رات کوشاں ہیں۔

پروپیگنڈا کرنیو الوں کو منہ کی کھانے پڑے گی۔حلقہ کوٹلہ میں رہنے والا ہر شخص میرے لیے قابل احترام ہے اور میں بلا تخصیص سب کے مسائل حل کرنے کے لیے کوشاں ہوں۔ان خیالات کا اظہار انہوں نے گزشتہ روز پرک اور پہیالیاں کے مقام پر مختلف منصوبہ جات کے افتتاح کے بعد جلسہ عام سے خطاب کرتے ہوئے کیا۔ا س موقع پر پارلیمانی سیکرٹری صدف شیخ،ایڈمنسٹریٹر ٹاؤن کمیٹی پٹہکہ علی اکبر عثمانی،صدر پی وائی او کوٹلی انیس اعوان اور دیگر نے بھی خطاب کیا۔

(جاری ہے)

جلسہ عام سے خطاب کرتے ہوئے وزیر جنگلات نے کہا کہ حلقہ کوٹلہ میں بلاامتیاز تعمیروترقی کا کام جاری ہے۔ تین سالہ کے عرصہ میں سڑکوں کی تعمیر،سکولوں کی تعمیر،صحت اور پینے کے صاف پانی کے کئی منصبوبے مکمل کیے جبکہ کئی دیگر منصوبوں پر کام تیزی سے جاری ہے۔انہوں نے کہا کہ عوام کی خدمت پیپلز پارٹی کی حکومت کی اولین ترجیحی ہے ۔ہم نے تھانہ کچہری اور برادری ازم اور دقیانوسی سیاست کا خاتمہ کر دیا ہے۔

انہوں نے کہا کہ میرا ایمان ہے کہ وزارتیں اور عہدے خدا کی طرف سے عطا کی گئی عزت ہے جن کی تقدس کا خیال رکھنا ضروری ہے۔انہوں نے کہا کہ پروپیگنڈا کرنے والے میرے دور میں تعمیروترقی دیکھ کر بوکھلاہٹ کا شکار ہو چکے ہیں میرا ضمیر مطمئن ہے اس لیے مجھے مخالفین کے منفی پروپیگنڈے کی پراہ نہیں۔اس موقع پر خطاب کرتے ہوئے پالیمانی سیکرٹری صدف شیخ نے کہا کہ حلقہ کوٹلہ کے عوام خوش قسمت ہیں جنہیں جاوید ایوب جیسا مخلص،نڈر ،سچا اور دلیر لیڈر ملا۔

وزیر جنگلات عوام کی خدمت کا سچا جذبہ رکھتے ہیں جو ہر وقت عوام کی خدمت کے لیے کوشاں ہیں۔انہوں نے کہا کہ ہماری حکومت نے حلقہ کوٹلہ میں بلاتخصیص ترقیاتی منصوبوں پر کام شروع کر رکھا ہے جس سے عام آدمی کے مسائل کم ہوئے ہیں۔پیپلز پارٹی کی حکومت نے گزشتہ ادوار کی محرومیوں کو کم کرنے کے لیے بہترین حکمت عملی کے تحت کام شروع کر رکھا ہے جس سے حلقہ کوٹلہ کے عوام کی تقدیر بدل کر رکھ دیں گے۔

انہوں نے کہا کہ عوام پیپلز پارٹی کو آئندہ الیکشن میں بھی کامیاب بنائیں تاکہ ہم مزید ترقیاتی اور فلاحی منصوبے مکمل کر کے خطہ کو ماڈل سٹیٹ بنا سکیں۔انہوں نے کہا کہ پرک اور پہالیاں کے عوام نے جس طرح وزیر جنگلات سردار جاوید ایوب کا استقبال کیااس پر وہ مبارکباد کے مستحق ہیں اور آج ثابت ہوگیا ہے کہ عوام ہمارے ساتھ ہیں اور آئندہ الیکشن میں بھی کامیابی پیپلز پارٹی کی ہوگی۔

متعلقہ عنوان :