مرغیوں کو بیماریوں سے بچانے کیلئے حفاظتی تدابیر پر عملدرآمد کیا جائے‘ محمد ارشد جٹ

بدھ 14 جنوری 2015 16:13

لاہور( اُردو پوائنٹ تازہ ترین اخبار۔ 14 جنوری 2015ء) وزیراعلیٰ پنجاب کے معاون خصوصی برائے محکمہ لائیوسٹاک چوہدری محمد ارشد جٹ نے کہا ہے کہ مرغیوں کو بیماریوں سے بچانے کیلئے حفاظتی تدابیر پر عملدرآمد کیا جائے اور شیڈ کی اچھی طرح صفائی سمیت اچھی قسم کے جراثیم کش ادویات کااستعمال بھی یقینی بنایا جائے تاکہ عوام کو صحت مند مرغیوں کے گوشت کی فراہمی ممکن ہوسکے۔

یہ بات انہوں نے ایک اجلاس کی صدارت کرتے ہوئے کہی۔ انہوں نے کہا کہ محکمہ لائیوسٹاک فارمرز خصوصاً مرغی پال حضرات شیڈ کا درجہ حرارت 75تا 80فارن ہائٹ تک رکھیں اور سردیوں میں ٹھنڈی ہوا کیلئے پلاسٹک کے پردے لگانے سے پرہیز کیا جائے۔ انہوں نے کہا کہ چونکہ پلاسٹک کے پردوں سے شیڈ میں نمی کا خدشہ ہوتا ہے جس سے پرندے دم گھٹ کر مرسکتے ہیں اس لئے موٹے جینز کے پردوں کو استعمال میں لایا جائے۔

(جاری ہے)

انہوں نے کہا کہ شیڈ میں تازہ ہوا کی آمدورفت کامناسب انتظام ہونا چاہیے جس کی وجہ سے سانس کی بیماریوں کاامکان بہت حد تک کم ہوجاتا ہے۔ رات کو پردے نیچے کرتے وقت تازہ ہوا کیلئے تھوڑا بہت رستہ رکھیں۔ شیڈ کا درجہ حرارت برقرار رکھنے کیلئے ہیٹر یا بھٹی کا استعمال کیاجائے اوراس بات کا خیال رہے کہ دھواں جمع نہ ہو کیونکہ دھویں سے پرندوں کے پھیپھڑوں پر اثر پڑتا ہے۔انہوں نے کہاکہ سردیوں میں پرندوں کو وٹامن ای دینا چاہئے۔ انہوں نے کہاکہ اس ضمن میں مزید معلومات کیلئے محکمہ لائیوسٹاک کے فیلڈ سٹاف سے مشاورت و رہنمائی حاصل کی جاسکتی ہے۔