یورپی پارلیمنٹ کے صدر مارٹن سخلٹز کی برسلز میں چیئرمین سینیٹ سید نیئر حسین بخاری سے ملاقات،

دہشت گردی اور انتہا پسندی کے خلاف جنگ میں پاکستان کی بھرپور حمایت کا اعادہ

جمعہ 30 جنوری 2015 20:29

اسلام آباد(اُردو پوائنٹ تازہ ترین اخبار۔ 30 جنوری 2015ء ) یورپی پارلیمنٹ کے صدر مارٹن سخلٹزنے بلجیم کے شہر برسلز میں چیئرمین سینیٹ سید نیئر حسین بخاری سے ملاقات کے دوران یورپی پارلیمنٹ کی طر ف سے دہشت گردی اور انتہا پسندی کے خلاف جنگ میں پاکستان کی بھرپور حمایت کا اعادہ کرتے ہوئے پاکستان کی کاوشوں کو سراہا ۔ملاقات میں چیئرمین سینیٹ نے یورپین پارلیمنٹ کے صدر کو پاکستان میں جاری دہشت گردی کے خلاف جنگ کے بارے میں آگاہ کیا اور اس بات پر زور دیا کہ اس لعنت سے چھٹکارا حاصل کرنے کیلئے مشترکہ کوششیں اشد ضروری ہیں ۔

یاد رہے کہ چیئرمین سینیٹ سید نیئر حسین بخاری ان دنوں برسلز کے دورے پر ہیں اور پاکستانی وفد جس میں سینیٹر ز روبینہ عرفان، ہیمن داس اور امرجیت شامل ہیں کی قیادت کر رہے ہیں ۔

(جاری ہے)

چیئرمین سینیٹ کا یہ دورہ مئی 2014 کے انتخابات کے بعد یورپین پارلیمنٹ کی نئی سیاسی قیادت سے اعلیٰ سطح پر پہلا رابطہ ہے ۔یورپین پارلیمنٹ کے صدر نے ایشیائی پارلیمنٹ کے قیام کے سلسلے میں چیئرمین سینیٹ کی کاوشوں کوسراہا اور اس سلسلے میں یورپین یونین اور بلجیم کی پارلیمنٹ کی طرف سے ہر ممکن تعاون کی یقین دہانی بھی کرائی ۔

دونوں پارلیمانی رہنماؤں نے پاکستان اور یورپین یونین کے مابین تعلقات کو مزید مستحکم کرنے اور پارلیمانی سطح پر وفود کے تبادلوں میں تیزی لانے پر بھی تبادلہ خیال کیا گیا ۔چیئرمین سینیٹ نے اس موقع پر ایشیائی پارلیمانی اسمبلی کے حوالے سے تفصیلی آگاہ کیا ۔ بعدازں بلجیم میں تعینات پاکستانی سفیر نغمانہ ہاشمی نے چیئرمین سینیٹ اور اُن کے وفد کے اعزاز میں عشائیہ بھی دیا جس میں پورپین پارلیمنٹ کے اراکین ، پورپین کمیشن اور تھنک ٹینکس کے علاوہ دیگر اعلیٰ حکام نے شرکت کی پورپین پارلیمنٹ میں ملاقات کے بعد چیئرمین سینیٹ نے پورپین پارلیمنٹ میں فرینڈز آف پاکستان گروپ کے چیئرمین سجاد کریم اور پورپی پارلیمنٹ کے رکن افضل خان سے بھی ملاقات کی ۔

ملاقات کے دوران خطے کی مجموعی صورتحال اور اہم معاملات زیر بحث آئے ۔چیئرمین سینیٹ اپنے اس دورے کے دوران یورپ کے ادارہ برائے ایشین سٹڈیز میں ایک اہم لیکچر بھی دیں گے جس میں وہ امن اور ترقی کے حوالے سے پاکستان کے ویژن پر شرکاء کو تفصیلی آگاہ کریں گے جبکہ بیلجیم کی سینیٹ کی صدر سے بھی ملاقات کریں گے ۔