حکومت جاپان کی طرف سے پاکستان میں سماجی ترقی کے مختلف منصوبوں کیلئے 36 ملین مالی امداد کی فراہمی ،

ا سلا م آباد (اُردو پوائنٹ تازہ ترین اخبار۔ 16فروری 2015ء) حکومتِ جاپان نے پاکستان کی چار غیر سرکاری تنظیموں کو ملک کے پسماندہ علاقوں میں سماجی ترقی کے مختلف منصوبوں پر عملدرآمد کیلئے مجموعی طور پر 36 ملین روپے کی مالی امداد فراہم کرنے کا فیصلہ کیا ہے۔ اِس ضمن میں آج باضابط طور پر جاپانی سفیر کی رہائش گاہ پر پاکستان میں جاپان کے سفیر جناب ہروشی اِنو ماتا او ر چاروں این جی اوز کے سربراہان نے معائدوں پر دستخط کیے اور دستاویزات کا تبادلہ بھی کیا۔

حکومتِ جاپان کی طرف سے مالی امداد حاصل کرنے والی اِن چار این جی اوز کے نام یہ ہیں: امیر بیگم ویلفیئر ٹرسٹ، المجتباع ڈویلپمنٹ نیٹ ورک، کمیونٹی ڈویلپمنٹ اینڈ انٹی ٹی بی پروگرام اور اوبید نور ویلفیئر ایسوسی ایشن ۔

(جاری ہے)

امیر بیگم ویلفیئر ٹرسٹ کو دی جانے والی مالی امداد US$ 82282 سے ضلع اوکاڑہ کے دیہی علاقوں میں 6 واٹر فلٹر پلانٹس لگائے جائیں جہاں گے کے مکین پینے کا صاف پانی نہ ہونے کی وجہ سے مختلف بیماریوں کا شکار ہیں ۔

المجتباع ڈویلپمنٹ نیٹ ورک کو دی جانے والی مالی امداد US$ 78833 سے ضلع مظفر آباد کے مضافاتی علاقوں میں پانی کی فراہمی اور حفظانِ صحت کے نظام میں بہتری لائی جاے گی۔ کیمیونٹی ڈویلپمنٹ اینڈ انٹی ٹی بی پروگرام کو دی جانے والی مالی امداد US$ 98138 سے ضلع نارووآل کے ایک دیہات میں سٹرک کی تعمیر کی جائے گی تاکہ لوگوں کی آمدورفت میں آسانی ہو۔ اوبید نور ویلفئیر ایسوسی ایشن کو دی جانے والی مالی امداد US$ 101697 سے ضلع میانوالی کے پسماندہ علاقے میں میٹرنٹی اینڈ ایمرجنسی ہسپتال کی تعمیر کی جائے گی۔

جاپان کے سفیر ہروشی اِنوماتا نے اِس موقع پر خطاب کرتے ہوے پاکستان کے دیہی علاقوں میں صحت، پانی اور انفراسٹرکچر کی سہولیات تک رسائی کو بہتر بنانے کی اہمیت پر زور دیا۔ اُنھوں نے اِس اُمید کا اظہار کیا کہ موجودہ منصوبے نہ صرف حکومتِ پاکستان کی دیہی اور شہری علاقوں میں تفاوت و تفریق کو ختم کرنے کے مقصد میں معاون ثابت ہوں گے بلکہ اِس سے جاپان اور پاکستان کے لوگوں کے مابین دوستانہ تعلقات کو مزید فروغ دینے میں بھی مدد ملے گی ۔

گزشتہ ہفتے تعلیم کے شعبے میں بہتری سے متعلق تین منصوبوں پر دستخط کیے گئے ۔ اِس کے علاوہ ستمبر سے نومبر 2014 تک تعلیم، انفراسٹرکچر اور صحت کے آٹھ منصوبوں پر پہلے ہی دستخط ہو چکے ہیں۔ جاپان کے موجود ہ مالی سال (جو پچھلے اپریل میں شروع ہوتا ہے) میں حکومتِ جاپان نے مجموعی طور پر پاکستانی غیر سرکاری تنظیموں کو US$ 1386114 کی مالی امداد فراہم کر چکی ہے۔