کینٹ و والٹن کنٹونمنٹ بورڈز میں الیکشن مہم کے باوجود انسداد ڈینگی سرگرمیاں جاری

لاہور ( اُردو پوائنٹ اخبار تازہ ترین۔ 17اپریل۔2015ء) رکن صوبائی اسمبلی لبنیٰ فیصل نے کہا ہے کہ لاہور کینٹ اورکنٹونمنٹ بورڈز میں الیکشن مہم کے باوجود انسداد ڈینگی سرگرمیاں تیزی سے جاری ہیں کیونکہ حالیہ بے موسمی بارشوں کی وجہ سے ڈینگی لاروا کی افزائش کے امکانات میں اضافہ ہو گیا ہے، انسداد ڈینگی مہم میں شامل تمام ادارے مربوط رابطے اور ٹیم ورک کی صورت میں ہنگامی حالات کے پیش نظر خدمات سرانجام دیں ،صوبہ بھر کی طرح کینٹ اور والٹن کنٹونمنٹ بورڈز میں 27اپریل کو ہفتہ صفائی منایا جائے گا-ڈینگی ریگولیشنز کی خلاف ورزی کرنے پر نوٹسزکا اجراء اور ایف آئی آر کا اندراج یقینی بنایا جائے۔

انہوں نے یہ بات اے سی کینٹ راؤ امتیاز احمد کے ہمراہ ٹاؤن ایمرجنسی رسپانس کمیٹی برائے انسداد ڈینگی کینٹ و کنٹونمنٹ بورڈز کے اجلاس کی صدارت کرتے ہوئے کہی۔

(جاری ہے)

ڈپٹی سیکرٹری ہائر ایجوکیشن نعمان جمیل، ڈپٹی ڈی او ہیلتھ کینٹ ڈاکٹر آصف محمود، سینئر انٹامالوجسٹ ، پرنسپلز گورنمنٹ گرلز اسلامیہ کالج کینٹ، رابعہ بصری کالج اور خواجہ رفیق شہید کالج کے علاوہ محکمہ تعلیم ، صحت، کوآپریٹو، فشریز ، ڈی ایچ اے اور آرمی کے نمائندوں نے اجلاس میں شرکت کی۔

اجلاس کوبتایاگیاکہ حالیہ موسم ڈینگی لاروا کی افزائش کے حوالے سے اہم ہے ۔ ڈینگی لاوا کی افزائش کو ہر صورت کنٹرول کیا جائے ۔لبنیٰ فیصل نے کہاکہ ٹائرشاپس، ورکشاپس ،پلازوں، دکانوں، پٹرول و سی این جی اسٹیشنوں، ہوٹلوں ،گوداموں و کمرشل مقامات کے مالکان اپنی جگہوں میں ڈینگی فری ماحول کو یقینی بنائیں ورنہ ڈینگی لاروا ملنے کی صورت میں ان کے خلاف سخت قانونی کاروائی کی جائے گی۔

اے سی کینٹ راؤ امتیاز احمد نے کہا کہ حالیہ بارشوں کی وجہ سے ڈینگی لاروا کی افزائش کا خطرہ بڑھ گیا ہے لہذا انسداد ڈینگی مہم کو مزید تیز کیا جائے اور عوام بھی اپنے گھروں اور اردگرد کے ما حول کو صاف اور خشک رکھیں ۔ انہوں نے کہا کہ لاہورو والٹن کنٹونمنٹ بورڈز، ڈی ایچ اے اور آرمی کے تحت تمام علاقوں خصوصاًقبرستانوں کی صفائی کو ایک ہفتے میں یقینی بنائیں -انہوں نے کہاکہ والٹن کے ہاٹ سپارٹ اور ہائی رسک علاقوں میں صفائی اور کوڑے کے ڈھیروں کو ہٹانے کے لئے تمام متعلقہ ادارے مشترکہ لائحہ عمل بنائیں اور فوری طورپر مذکورہ علاقوں کی صفائی کو یقینی بنایا جائے ۔

تمام متعلقہ اداروں کے مکمل تعاون اورمشترکہ کوششوں سے ہی اس وبا کے خاتمے کو یقینی بنایا جاسکتاہے ۔ اجلاس کو بتایا گیاکہ انسداد ڈینگی مہم کو مزید تیز کر دیا گیا ہے اور جامع حکمت عملی کے تحت ڈ ینگی لاروا کے سروے اور ملنے کی صورت میں اس کو تلف کرنے کے عمل کو تیز بنایا گیا ہے۔اس موقع پر صحت، ماحولیات اور دیگرمحکموں نے انسداد ڈینگی اقدامات کے متعلق بریفنگ دی۔