چین گوادر میں آ ئند ہ سال 60ارب کے پا نچ منصو بے شروع کر ے گا

اسلام آباد(اُردو پوائنٹ اخبار تازہ ترین۔ 30اپریل۔2015ء) پاک چین اقتصادی راہداری کے منصوبوں سمیت چین گوادر میں اگلے مالی سال کے دوران تھرمل بجلی کے دو جبکہ تعلیم صحت اور مواصلات کے تین منصوبوں پر کام شروع کر ے گا ،ان منصوبوں کی مالیت 60ارب روپے سے زائد ہوگی وزارت منصوبہ بندی کے ذرائع کے مطابق چین کے سرمایہ کاروں کے تعاؤن سے گوادر میں توانائی پینے کے صاف پانی کی فراہمی صحت انڈسٹریل زون اور مواصلات کے شعبے میں منصوبے شروع کئے جارہے ہیں ان منصوبوں میں تھرمل بجلی کے دو منصوبے بھی شامل ہیں جن سے مجموعی طور پر 300میگا واٹ بجلی حاصل کی جا سکے گی ان منصوبوں پر مجموعی طور پر 36ارب روپے خرچ کئے جائیں گے بلوچستان کے نوجوانوں کی پیشہ ورانہ مہارت میں اضافے کیلئے پاک چائنہ وکیشنل ٹریننگ انسٹی ٹیوٹ کے قیام پر ایک ارب روپے خرچ کئے جائیں گے گوادر میں پینے کے صاف پانی کی فراہمی اور نکاسی آب کے منصوبوں کیلئے 13ارب 20کروڑ روپے خرچ کئے جائیں گے ان منصوبوں پر واٹر فلٹریشن پلانٹس سمیت سمندر کے کھارے پانی کو میٹھا بنانے کے منصوبے شامل ہیں گوادر میں فری ٹریڈ زون بنانے کے لئے زمین کی خریدار ی پر بھی 1ارب 40کروڑ روپے خرچ کئے جائیں گے جبکہ چین کی حکومت گوادر میں صحت کی سہولیات فراہم کرنے کیلئے 10ارب روپے کی لاگت سے ہسپتال تعمیر کرے گا جس میں علاج و معالجہ کی مفت سہولیات فراہم کی جائیں گی۔