ہیلتھ پیکیج منظوری ، 144آسامیوں میں 20آسامیاں مظفرآباد کیلئے مشتہر کرنا ظلم عظم ہے ، وزیرصحت متعصبانہ رویہ ترک کرتے ہوئے انصاف پرمبنی فیصلہ کریں

جنرل سیکرٹری مسلم لیگ (ن) مظفرآباد آصف مصطفائی کا بیان

جمعرات 30 اپریل 2015 17:55

مظفرآباد(اُردو پوائنٹ اخبار تازہ ترین۔ 30اپریل۔2015ء) ہیلتھ پیکیج منظوری ، 144آسامیوں میں 20آسامیاں مظفرآباد کیلئے مشتہر کرنا ظلم عظم ہے ، وزیرصحت متعصبانہ رویہ ترک کرتے ہوئے انصاف پرمبنی فیصلہ کریں ، حلقہ انتخابات میں آسامیوں کو ریوڑیوں کی طرح بانٹنا ، آمدہ الیکشن میں ووٹ بنک بنانا ،آسامیاں بھی من پسندوں کوتخلیق کرنا جیسے اقدام نہ صرف میرٹ کاستیاناس ہے بلکہ اقربا پروری کی عمدہ مثال قائم کی جارہی ہے ، مسلم لیگ (ن) کی آنکھ سب کچھ دیکھ رہی ہے ، غیوران مظفرآباد اپنے ساتھ ہونیوالی کسی بھی قسم کی زیادتی کوبرداشت نہیں کریں گے ، اگر وزیرموصوف نے متعصبانہ رویہ ترک نہ کیا اورمظفرآباد کونظرانداز کیاگیا تو اینٹ سے اینٹ بجا دیں گے ، ان خیالات کااظہار جنرل سیکرٹری مسلم لیگ (ن) مظفرآباد آصف مصطفائی نے اپنے جاری کردہ اخباری بیان میں کیا ٗ آصف مصطفائی کاکہناتھاکہ وزیر صحت فوری طورپر پریس کانفرنس کریں اورمیڈیا کے سامنے آسامیوں کاکھل کراظہار کریں اگر مندرجہ بالا آسامیوں اپنے منظور نظرچہیتوں میں تقسیم ہوئیں تومسلم لیگ نواز میرٹ پامالی کے خلاف شدید احتجاج کرے گی ،مظفرآباد ڈویژن کو میرٹ کے لحاظ سے نظراندازکیاگیا تو وزیرموصوف کو اس کے بھیانک نتائج بھگتنا پڑیں گے ۔

متعلقہ عنوان :