Live Updates

لیبر کمیونٹی بھی تبدیلی کی خواہاں ہے ،مزدوروں کا استحصال کرنے والے کیسے تحفظ دے سکتے ہیں‘عبدالعلیم خان

محنت کش طبقے کیلئے حکومتی اقدامات زبانی جمع خرچ ہیں ،قوانین پر عمل درآمد نہ ہونا تشویشناک ہے‘ ضلعی صدر پی ٹی آئی کی وفد سے گفتگو

جمعہ 1 مئی 2015 17:55

لاہور ( اُردو پوائنٹ اخبار تازہ ترین۔ یکم مئی۔2015ء) تحریک انصاف ضلع لاہور کے صدر عبدالعلیم خان نے کہا ہے کہ یوم مئی لیبر کمیونٹی سے عملی طور پر اظہار یکجہتی اور اُن کی فلاح و بہبود کے اقداما ت کا تقاضا کرتا ہے اور ضرور ت اس امر کی ہے کہ جدید تقاضوں اور بنیادی ضرورتوں کے مطابق عارضی ملازمتوں پر کام کرنے والے مزدوروں کو زیادہ سے زیادہ تحفظ فراہم کیا جائے ،لیبر کمیونٹی بھی تبدیلی کی خواہاں ہے لیکن مزدوروں کا استحصال کر کے اقتدار میں آنے والے انہیں کیسے تحفظ فراہم کر سکتے ہیں ایک طرف اسلامی اصولوں کو نظر انداز کیا جاتا ہے تو دوسری طرف مروجہ قوانین کی بھی خلاف ورزی بھی ہوتی ہے،واضح طور پر محنت کش طبقے کیلئے حکومتی اقدامات صرف اور صرف زبانی جمع خرچ ہیں جن کا زمینی حقائق کے مطابق مزدوروں کی فلاح و بہبود سے دور کا بھی تعلق نہیں ،نئے قوانین کا نہ بننا اور پہلے سے موجود ضوابط پر عمل درآمد نہ ہونا تشویشناک ہے جس کے باعث پاکستان عالمی برادری میں بھی بدنام ہوتا ہے جبکہ حکمران یوم مئی کو بھی فوٹو شوٹ کروانے اور اخباری بیانات دینے پر اکتفا ء کرتے ہیں ۔

(جاری ہے)

پی ٹی آئی لاہور آفس میں لیبر ونگ کے وفد سے گفتگو کرتے ہوئے عبدالعلیم خان نے کہا کہ تحریک انصاف کا ایجنڈہ مزدوروں کی فلاح و بہبود پر مبنی ہے جس میں محنت کشوں بالخصوص خواتین ورکرز کی سماجی بہتری کیلئے عملی اقدمات تجویز کئے گئے ہیں انہوں نے موجودہ حکومت کی پالیسیوں کو تنقید کا نشانہ بناتے ہوئے کہا کہ تقدیر بدلنے کا دعو یٰ کرنے والے گذشتہ 2برسوں میں ایک میگا واٹ بھی بجلی پیدا نہیں کر سکے جس کا بلا واسطہ نقصان لیبر کمیو نٹی کو اُٹھانا پڑ رہا ہے دوسری طرف قومی اداروں کی یک طرفہ پرائیوٹائزیشن بھی مزدور کش فیصلہ ہے ۔

عبدالعلیم خان نے کہا کہ ورلڈ بینک اور آئی ایم ایف کے اشاروں پر ہونے والے فیصلے بھی غریب کش ہیں جن پر پی ٹی آئی نے ہمیشہ آواز بلند کی ہے انہوں نے کہا کہ یوم مئی تقاضا کرتا ہے کہ ہم اسلامی تعلیمات کے مطابق محنت کشوں کو اُن کے حقوق کی فراہمی یقینی بنائیں اور انہیں زیادہ سے زیادہ سہولتیں دے کر معاشرے میں مناسب مقام دیں ۔اس موقع پر نے ضلعی صدر عبدالعلیم خان کو پی ٹی آئی لیبر ونگ کی کارکردگی سے آگاہ کیا اور بلخصوص یوم مئی کے حوالے سے کی جانے والی سرگرمیوں پر روشنی ڈالی ۔

Live پاکستان تحریک انصاف سے متعلق تازہ ترین معلومات