حلقہ پونچھ عباسپور یونین کونسل تاہی سہڑھ کا علاقہ کائی کنوئیاں بنیادی سہولتوں سے محروم

تتہ پانی(اُردو پوائنٹ اخبار تازہ ترین۔ 10 مئی۔2015ء) حلقہ پونچھ عباسپور یونین کونسل تاہی سہڑھ کا علاقہ کائی کنوئیاں بنیادی سہولتوں سے محروم،سکول،سڑک ،پانی،صحت عامہ سمیت کوئی سہولت میسر نہیں،عوام علاقہ میڈیا کے سامنے پھٹ پڑے،حلقہ کے عوامی نمائندگان کی طرف سے مسلسل نظر اندازی،جلد نئے لائحہ عمل کا فیصلہ،تفصیلات کے مطابق کے مطابق یونین کونسل تاہی سہڑھ کے علاقے کائی کنوئیاں بنیادی سہولتوں سے محروم ہیں ،سکول،سڑک ،پانی،صحت عامہ سمیت کوئی سہولت میسر نہیں،عوام علاقہ آج کے جدید دور میں بھی کسمپرسی کی زندگی گزار رہے ہیں،عوام علاقہ نے اپنی مدد آپ کے تحت ایک پرائمری سکول،تقریبا5 کلومیٹر لنک روڈ اپنی مدد آپ کے تحت تعمیر کی ، جو بارشوں کی نذر ہوکر ٹوٹ پھوٹ کا شکار ہے۔

(جاری ہے)

علاقے کے مکینوں سردار محمد صادق،اظہر اقبال،صوبیدار (ر) محمد سلیم،صوبیدار (ر) اختر حسین،سردار پنوں خان ,سردار محمد افسر،عمر حیات،شعور احمد،محمد حسین،سردار ایاز،سردار نعیم،ریحان احمد،ناصر حسین،پرویز اقبال، افتخار احمد،محمد قاسم،عمران احمد،کامران احمد، محمدآصف، اور دیگر نے اظہارخیال کرتے ہوئے کہا کہ حلقہ سے نمائندگی کرنیوالے ممبر اسمبلی یاسین گلشن،امجد یوسف،سردار عبدلقیوم نیازی سے کئی بار وفود کی صورت میں ملاقاتیں کیں،انھوں نے ہمیشہ جھوٹی تسلیاں دیکر عوام علاقہ کی آنکھوں میں دھول ہی جھونکی،بنیادی سہولتیں فراہم کرنا ہر حکومت کا فرض ہے ،لیکن عوامی نمائندے صرف الیکشن کے دوران اس دور افتادہ علاقے میں ووٹ حاصل کرنے کے لیے تشریف لاتے ہیں، گزشتہ الیکشن میں عوامی نمائندوں نے علاقہ کے لیے سڑک ،بجلی،پانی اور تعلیمی سہولیات دینے کے اعلانات کیے جن پر آج تک عملد ر آمد نہ ہوسکا،عوام علاقہ آج بھی پتھر دور کی زندگی گزارنے پر مجبور ہیں،ہم جلد نئے لائحہ عمل کا اعلان کریں گے،عوامی ایکشن کمیٹی تشکیل دی جا چکی ہے،جو عوام علاقہ کے جملہ مسائل کے لیے آواز بلند کرے گی،سیاسی نمائندے آج تک اس دور افتادہ علاقے کے لیے کچھ کر سکے،حلقہ کا آخری گاؤں ہونے کے باعث ہمیشہ کی طرح نظر انداز کیا گیا،اپنے حقوق کے لیے جلد تحریک کا آغاز کریں گے،چیف سیکرٹری آزادکشمیر ،صدر ریاست اور وزیر اعظم آزادکشمیر عوام علاقہ کائی کنوئیاں کے جملہ مسائل حل کرنے کے لیے ٹھوس بنیادوں پر اقدامات کریں اور عوام علاقہ کو بنیادی سہولتوں کی فراہمی کو یقینی بنایا جائے۔