کولا مشروبات کا استعمال گیسٹرو اور اسہال میں اضافہ کا باعث بنتا ہے‘ حکماء

جمعرات 21 مئی 2015 16:09

لاہور (اُردو پوائنٹ اخبار تازہ ترین۔ 21مئی۔2015ء) پاکستان طبی کانفرنس لاہور ڈویژن کے زیر اہتمام گیسٹرو ، اسباب اور تدارک کے موضوع پر مجلس مذاکرہ کا انعقاد ہوا جس میں پروفیسر حکیم اعجاز فاروقی ، حکیم محمدجاوید رسول، پروفیسر حکیم محمد احمد سلیمی ، پروفیسر حکیم سید عمران فیاض ، حکیم محمد افضل میو ، حکیم احمد حسن نوری ، حکیم عطاء الرحمان صدیقی ، حکیم امجد وحید بھٹی اور دیگر ماہرین نے شرکت کی ۔

اس موقع پر حکماء نے کہا کہ گیسٹرو نظامِ ہضم کی ایک ایسی شدید بیماری ہے جس میں معدہ اورچھوٹی آنت میں سوزش ہوتی ہے جس سے شدید اسہال آنا شروع ہو جاتے ہیں ۔ اس بیماری میں خواتین و حضرات اور بچے یکساں طور پر مبتلا ہوتے ہیں۔ یہ بیماری دنیا بھر میں عام ہے۔ اور یہ آلودہ غذا اور پانی سے پھیلتی ہے ۔

(جاری ہے)

گیسٹرو زیادہ ترمختلف وائرس(روٹا وائرس، اڈینو وائرس، کیلسی وائرس، اسٹرو وائرس، نور واک وائرس اور نورو وائرس) کی وجہ سے ہوتی ہے اور بعض اوقات بیکٹیریا ،ان کے زہر،طفیلیے یا بعض غذاؤں اور دواؤں کے مابعد اثرات کی وجہ سے بھی ہو جاتی ہے ۔

یہ مرض ایک شخص سے دوسرے شخص کو لاحق ہو سکتا ہے۔ حکماء نے کہا کہ جوس یا سوفٹ ڈرنک(کولا مشروبات ) کا استعمال اسہال میں اضافہ کا باعث بنتا ہے بلکہ ان کے استعمال سے اسہال سنگین صورت اختیار کر جاتا ہے۔یہ بیماری عام طور پر شدید صورت میں ظاہر ہوتی ہے اور خاص طور پر موسمِ گرما اور برسات میں اس کے مریضوں میں خاصا اضافہ ہو جاتا ہے گیسٹرو سے بچاؤ کے لیے احتیاط بہت اہم ہے۔

اس کے لیے درج ِذیل احتیاطی تدابیر اختیار کرکے ہم گیسٹرو اور اس جیسے خطرناک امراض سے محفوظ رہ سکتے ہیں - #کھانا کھانے سے پہلے اور رفعِ حاجت (غسل خانہ استعمال کرنے) کے بعد اپنے ہاتھ لازمی دھوئیں ۔#پینے والے پانی کی صفائی کا خیال رکھیں۔ پانی ابال کر یا فلٹر شدہ استعمال کریں ۔#حفظانِ صحت کے اصولوں کے مطابق تیار شدہ تازہ خوراک استعمال کریں۔#اپنی غذا میں سرکہ، پیاز اور پودینہ کا خصوصی استعمال کریں۔#آلودہ پانی، گلے سٹرے اور کٹے ہوئے پھلوں کے استعمال بالخصوص تربوز اور کھیرے کے استعمال سے پرہیز کریں۔