پاکستان میں پولیو مہم کو مکمل کر نے کیلئے 22ملین ڈالرز کے مزید فنڈز درکار ہیں ‘ حکام

اسلام آباد (اُردو پوائنٹ اخبار تازہ ترین۔ 20 جون۔2015ء) پاکستان میں پولیو مہم کو مکمل کر نے کیلئے 22ملین ڈالرز کے مزید فنڈز درکار ہیں نجی ٹی وی کے مطابق صوبائی صحت کے محکموں نے پلاننگ کمیشن کو آگاہ کیا ہے کہ موجودہ مہم کو مکمل کرنے کے لیے 22 ملین ڈالرز کے مزید فنڈز درکار ہیں جبکہ 2016 تک چلنے والے اس تین سالہ پروگرام کو مکمل کرنے کے لیے مزید 314 ملین ڈالرز کی رقم کی ضرورت پڑے گی۔

خیال رہے کہ 2014 کے 306 کیسز کے مقابلے میں رواں سال اب تک صرف 25 نئے پولیو کے کیسز ہی سامنے آئے ہیں ۔نیشنل ہیلتھ سروسز کی وزارت کے ایک اہلکار نے نام ظاہر نہ کرنے کی شرط پر بتایا کہ اگر اس موقع پر پیسوں کی وجہ سے یہ پروگرام رک جاتا ہے تو یہ ایک بہت بڑا سانحہ ہوگا۔انہوں نے بتایا کہ اسلامک ڈیلویلپمنٹ بینک نے پاکستان کو تین سالہ پروگرام کے لیے 327 ملین ڈالر رقم لون پر دی تھی تاہم بل گیٹس اور میلنڈا فاوٴنڈیشن نے اس رقم کو لون کے بجائے گرانٹ میں تبدیل کردیا تھا انہوں نے بتایا کہ آئندہ تین سالوں کیلئے ایک نیا پی سی ون تیار کیا جارہا ہے جس کیلئے 314 ملین ڈالر کی رقم کی ضرورت ہوگی۔

(جاری ہے)

'اس بار حکومت پاکستان کو مشورہ دیا جائے گا کہ وہ ملک سے پولیو وائرس ختم کرنے کے لیے پروگرام کی نصف رقم ادا کرے۔انہوں نے بتایا کہ اس بار قیاس آرائیاں کی جارہی ہیں کہ پروگرام کے ماڈل کو تبدیل کرتے ہوئے ایک تیسرے فریق کو شامل کی جائیگا جس پر ڈبلیو ایچ او، یونیسیف اور دیگر اسٹیک ہولڈرز بھروسہ کرتے ہیں۔نیشنل ایمرجنسی آپریشن سینٹر کے کواٰرڈینیٹر ڈاکٹر رانا محمد صفدر نے اجلاس کو بتایا کہ 2015 کے لیے فنڈز دستیاب ہیں تاہم ویکسین خریدنے میں تین کا عرصہ درکار ہوتا ہے جس کے لیے اگلے سال کے تین ماہ کے لیے پہلے سے انتظامات کرنے پڑتے ہیں۔انہوں نے کہا کہ وہ بل اور میلنڈا گیٹس فاوٴنڈیشن کے ساتھ رابطے میں ہیں اور انہوں نے اس سلسلے میں یقین دہانی کروائی ہے۔