عوام کو فوری طور پر ڈینگی مچھروں کی افزائش کے عمل کو گھروں اور چھتوں میں قائم ٹھکانوں کا صفایا کرناہوگا‘ ملک محمد اقبال چنٹر

لاہور (اُردو پوائنٹ اخبار تازہ ترین۔ 08 اکتوبر۔2015ء) صوبائی وزیر کوآپریٹو ملک محمد اقبال چنٹر نے کہا ہے کہ حکومت نے مختلف رپورٹوں کی بناء پر ڈینگی کی افزائش میں تیزی کے بعد تمام محکموں کی جانب سے منظم طریقہ سے ہنگامی اور جنگی بنیادوں پر اقدامات تیز کردئیے ہیں، عوام کو فوری طور پر ڈینگی مچھروں کی افزائش کے عمل کو لگام ڈالنے کے لیے گھروں کے اندر اور چھتوں پر ان کی افزائش کے ٹھکانوں کا صفایا کرنا ہوگا جبکہ ٹائروں کی دکانوں ، گوداموں اور پانی کے جوہروں کا بھی فوری طور پر خاتمہ کرنا ہوگا، اس سلسلے میں صوبہ بھر کی کوآپریٹوہاؤسنگ سوسائٹیاں رول ماڈل کا کردار ادا کررہی ہیں جہاں پر صفائی نصف ایمان کو حقیقی فوقیت حاصل ہے۔

اس امر کا اظہار انہوں نے سوئی گیس کوآپریٹو ہاؤسنگ سوسائٹی ڈی ایچ اے کے کمیونٹی ہال میں انسداد ڈینگی کے حوالے سے منعقدہ سیمینار سے خطاب میں کیا۔

(جاری ہے)

اس موقع پر سیکرٹری کوآپریٹو، رجسٹرار کوآپریٹو، ڈسٹرکٹ کوآپریٹو آفیسر سیٹھ محمد اقبال ڈی ڈی سی او فرخ حیات پنوں اور دیگر افسران کے علاوہ مختلف سوسائٹیوں کے نمائندگان بھی موجود تھے۔ صوبائی وزیر کوآپریٹو ملک محمدا قبال چنٹر نے کہا کہ تمام سرکاری محکمے ڈینگی کی وباء پر قابو پانے کے لیے دن رات محنت کررہے ہیں تاہم ان کوششوں میں بھرپور عوامی شرکت ڈینگی پر موثر انداز میں قابوپانے کے لیے ناگزیر ہے۔

انہوں نے کہا کہ وزیر اعلیٰ پنجاب تمام صورت حال کی خود نگرانی کررہے ہیں۔ انہوں نے کہا کہ معاشرے کے تمام طبقوں کو ڈینگی پر قانو پانے کے لیے اپنا بھرپور کردار ادا کرنا چاہیے تاکہ اس موذی وبا پر جلد از جلد قابو پایا جاسکے۔ انہوں نے کہا کہ ڈینگی کنٹرول کا نئی حکمت عملی کے تحت تمام ٹاؤن اور یونین کونسلوں میں باہمی مشاورت اور حکمت عملی کے ذریعے سپرے اور فوگنگ کی جائے۔