اسہال، ڈائریا بچوں میں اموات کی دوسری بڑی وجہ ، ہر سال 5 ہزار بچے پانچ سال تک پہنچنے سے پہلے مر جاتے ہیں، اعجاز احمد خان

راولپنڈی (اُردو پوائنٹ اخبار تازہ ترین۔ 14 اکتوبر۔2015ء) اسہال/ڈائریا‘بچوں میں اموات کی دوسری بڑی وجہ ہے۔ہرسال5000بچے‘5سال تک کی عمر تک پہنچنے سے پہلے‘ حفظان صحت سے عدم توجہ کی وجہ سے اور ڈائریا میں مبتلا ہو کر موت کا شکار ہوجاتے ہیں اس لئے صحت کے تحفظ کے لئے ہاتھ دھونا ایک روایتی ویکسین کی حیثیت رکھتا ہے اس کیلئے سادہ اور موثر اقدامات یعنی پانی‘صابن‘ صفائی اور خشک کرنے کے عمل کو اپنانے کی ضرورت ہے اس کے نتیجے میں آپ ڈائریا اور سانس کی بیماریوں سے بچ سکتے ہیں۔

یہ بات شفا انٹرنیشنل ہسپتال کے ماہر کنسلٹنٹ برائے اطفال اعجاز احمد خان نے لوگوں سے خطاب کرتے ہوئے کہی۔شفاانٹرنیشنل ہسپتال نے ہاتھ دھونے کے عالمی دن کے موقع پہ ایک شاندار آگاہی کا پروگرام شفا کے سرسبز لان میں منعقد کیا۔

(جاری ہے)

جس کا مقصد بیماری کی روک تھام کے لئے ایک موثر اور سستا طریقہ کے طور پر صابن کے ساتھ ہاتھ دھونے کی اہمیت کے بارے میں عوام میں شعور بیدار کرنا تھا۔

ڈاکٹروں‘ سکول کے بچوں‘ان کے والدین‘ اساتذہ اور راولپنڈی اور اسلام آباد کے عام باشندوں کی ایک بڑی تعدادنے خاص طو رپر اس رنگا رنگ پروگرام میں شرکت کی۔اس سال ہاتھ دھونے کے عالمی دن کے لئے موضوع”حفظان صحت کے لئے ہاتھ بڑھاؤ“ تھا۔بچوں نے پیٹنگ مقابلہ‘تقریر مقابلہ اور متعدد دلچسپ سرگرمیوں میں بڑھ چڑھ کر حصہ لیا۔شفا کے ڈائریکٹر میڈیکل سروسز ڈاکٹر میاں امجد سہیل نے مقابلوں میں کامیاب ہونے والے بچوں میں تحفے اور انعام تقسیم کئے۔

ڈاکٹر اعجا زاحمد خان نے لوگوں نے خطاب کرتے ہوئے کہا کہ صابن سے ہاتھ دھونا‘ موسمی فلو‘ عام سردی‘ وائرل بیماریوں کے خلاف سب سے سستا اور سب سے موثر ویکسین ہے۔انہوں نے کہا کہ ڈائریا‘آنتوں کی بیماریوں‘ شدید سانس کی بیماریاں جو دنیا بھر میں لاکھوں بچوں کی جان لے لیتی ہیں سے بچنے کے ضروری ہے کہ کھانے کی تیاری سے پہلے اور دوران‘کھانا کھانے کے بعد‘ زخموں کوہاتھ لگانے کے بعد‘ کھانسنے کے بعد‘ ناک کی صفائی کے بعد اور بیمار کی دیکھ بھال کے بعد صابن سے ہاتھ دھونے چاہئیں۔

ڈاکٹر اعجاز نے اس بات پر بھی زور دیا کہ ٹوائلٹ کے استعمال کے بعد صابن سے ہاتھ دھونا بہت اہم ہے کیونکہ یہ ڈائریا کی بیماریوں‘ ہیضہ‘دیگر تمام عام وبڑے پیمانے پر گیسٹروانفیکشن‘انفلوئنزا اورنمونیا اور سانس کی بیماریوں کے لگنے کا سبب بن سکتا ہے۔صابن سے ہاتھ دھونا ڈائریا کی بیماری کے خطرے کو 50سے30فیصد تک اور سانس کی نالی کے انفیکشن کو 45سے21فیصد تک کم کردیتا ہے۔شفاکے چیف ایگزیکٹو آفیسر ڈاکٹر منظورالحق قاضی اور چیف آپرییٹنگ آفیسر عزیزاحمد جان نے باضابطہ تقریب کا افتتاح کیا اور بچوں کو صحت مند رہنے کے لئے باقاعدگی سے صحت مند عادات اور حفظان صحت کے مطابق ہاتھ دھونے کواپنانے کی ہدایت کی۔