امراض چشم و گردہ کے مریضوں کیلئے مخیر افراد’’ ریڈو‘‘ کی معاونت کریں، ماہانہ 50 لاکھ روپے کے لاگت سے مستحق مریضوں کا علاج کیا جا رہا ہے ، سینکڑوں مریض ویٹنگ لسٹ پر ہیں

سیکر ٹری جنرل ریڈو ہارون رشید کابیان

پیر 13 جون 2016 22:47

راولپنڈی (اُردو پوائنٹ اخبارتازہ ترین - آئی این پی۔13 جون ۔2016ء) راولپنڈی آئی ڈونرز آرگنائزیشن (ریڈو) کے زیر انتظام ریڈو میڈیکل کمپلکسI- راولپنڈی میں گردے کے مریضوں کے ڈائیلائسز اور آنکھوں کے امراض کے علاج کے لئے مخیر افراد اور ادارے مالی عطیات دے کر مستحق و بے سہارا مریضوں کی مدد کریں۔سیکریٹری جنرل ریڈو ہارون رشید نے بتایا کہ ریڈو میں ہر ماہ نو سوسے زائد ڈائیلائسز کیے جا رہے، جبکہ چار سو سے زائد آنکھوں کے آپریشن کئے جاتے ہیں جن پر مجموعی طور پر50 لاکھ روپے لاگت آتی ہے ۔

مالی وسائل کی کمی کے باعث ویٹنگ لسٹ میں لا تعداد مریض علاج کے منتظر ہیں جن کے لئے مخیر افراد ریڈو سے رابطہ کر سکتے ہیں۔ ہارون رشید نے کہاکہ ریڈو چالیس سال سے طبی شعبے میں خدمات سر انجام دے رہا ہے اور صاحب ثروت افراد اور اداروں کے تعاون سے خدمت کا یہ سلسلہ کامیابی کے ساتھ جاری ہے اور اب تک لاکھوں کی تعداد میں مریض اس ادارے سے فیضاب ہو چکے ہیں۔

(جاری ہے)

انہوں نے کہاکہ ماہ رمضان کے دوران زکوٰۃ، صدقات اور عطیات دے کر گردے اور آنکھوں کے غریب و نادار مریضوں کا فوری علاج ممکن بنا سکتے ہیں۔ ہارون رشید نے کہا کہ ریڈو میڈیکل کمپلکس میں ماہر طبی معا لجین کی زیر نگرانی علاج کی بہترین سہولیات فراہم کی جا رہی ہیں اور مخیر افراد کے تعاون سے ریڈو کی طبی سہولیات کا دائرہ کار وسیع کیا جا رہا ہے۔