چیف سیکرٹری پنجاب کی خصوصی ہدایت پر سول سیکرٹریٹ میں ڈینگی ڈے منایا گیا

لاہور۔23 جولائی(اُردو پوائنٹ اخبارتازہ ترین - اے پی پی۔23 جولائی۔2016ء) چیف سیکرٹری پنجاب کیپٹن (ر) زاہد سعید اور ایڈیشنل چیف سیکرٹری پنجاب شمائل احمد خواجہ کی خصوصی ہدایت پر سیکرٹریٹ میں ڈینگی ڈے منایا گیا ،اس موقع پر خصوصی واک کا اہتمام بھی کیا گیا جس میں مدثر ریاض ملک ایڈیشنل سیکرٹری ویلفیئر نے چیف سیکرٹری پنجاب اور ایڈیشنل چیف سیکرٹری پنجاب کی نمائندگی کی ، اس موقع پر نواز خالد عاربی ایڈیشنل سیکرٹری خزانہ ، اکرام اللہ نیازی ایڈیشنل سیکرٹری ریگولیشن، حسین بہادر علی ،عمران اکرم چوہان ڈپٹی سیکرٹریز سمیت دیگر افسران و ملازمین کی کثیر تعداد نے شرکت کی ، واک کا آغاز پریس سیکرٹری عبدالکریم اعوان نے تلاوت کلام پاک سے کیا، شرکاء سے خطاب کرتے ہوئے ایڈیشنل سیکرٹری ویلفیئر مدثر ریاض ملک نے کہا کہ حکومت پنجاب نے جس طرح سے ترجیحی بنیادوں پر ڈینگی کے خلاف اقدامات کئے ہیں اور عوام میں جس طرح سے شعور و آگہی کی مہم شروع کی ہے اس کا نتیجہ ہے کہ اللہ کے فضل و کرم سے ڈینگی کا خاتمہ ہو رہا ہے اور لوگوں میں جو خوف و ہراس تھا اس میں کمی واقع ہو گئی ہے ، عوام صفائی اور نفاست کواپنائیں ، اپنے ارد گرد کے ماحول کو صاف ستھرا رکھیں تاکہ ڈینگی جیسے موذی مرض سے مکمل نجات مل سکے،انہوں نے کہا کہ خصوصی طور پر ڈینگی کی افزائش سے پہلے جو حفاظتی اقدامات ہیں ان کو اپنانے کی ضرورت ناگزیر ہو چکی ہے ۔