برسات کے موسم میں بیماریوں سے بچاوٴ کے لیے خصوصی احتیاط ضروری ہے‘ حکماء

لاہور ( اُردو پوائنٹ اخبارتازہ ترین - این این آئی۔02 اگست ۔2016ء) برسات کا موسم بیماریوں کے حوالے سے انتہائی خطرناک ہوتا ہے،یہ پندرہ جولائی سے پندرہ ستمبر تک رہتا ہے ،ہوا میں نمی کا تناسب بڑھ جاتا ہے ،حبس اور گرمی سے انسان کا جینا دشوار ہوجاتا ہے، اس موسم میں ڈائیریا،ہیضہ، بدہضمی، جوڑوں کادرد ،گرمی دانے ،پھوڑے پھنسیاں،خارش،کیل مہاسے ،پاوٴں کی انگلیوں کا فنگس وغیرہ بیماریوں میں اضافہ ہوجاتا ہے۔

ان خیالات کا اظہار نائب صدر قومی طبی کونسل حکومت پاکستان پروفیسروید محمد جمیل خاں ،حکیم جاوید رسول ،حکیم محمد احمد سلیمی ،حکیم محمد افضل میو ،حکیم حامد محمود ،حکیم ظہور احمد چوہدری، حکیم جعفر طیار اور حکیم عیسیٰ نذیری نے موسم برسات ،بیماریاں اور احتیاطی تدابیر کے حوالہ سے مجلس مذاکرہ سے خطاب کرتے ہوئے کیا۔

(جاری ہے)

انہوں نے کہاکہ اس موسم میں گلی،محلو ں اور نشیبی علاقوں میں پانی کھڑا ہونے کے باعث جراثیم پیدا ہوجاتے ہیں جوکئی بیماریاں پیداکرنے کا باعث بنتے ہیں۔

ان بیماریوں سے بچاوٴ کیلئے اپنے گھر کی صفائی رکھیں،بچے ہوئے اناج اور پھل ڈھکن والے ڈسٹ بن میں ڈالیں،فرش فینائل وغیرہ سے دھوئیں،گھر میں نیم کے پتوں،گوگل،گندھک یا اوپلوں کی دھونی دیں یا کوئی بھی جراثیم کش ادویہ کا سپرے کریں۔ پانی ابال کر پئیں،کھانے پینے میں احتیاط برتیں۔ تربوز،کھیرا،ککڑی، امرود خربوزہ وغیرہ نہ کھائیں۔کھانے پینے والی اشیا ڈھانپ کر رکھیں۔اپنی جسمانی صفائی کا خاص خیال رکھیں،گیلا لباس نہ پہنیں۔دن میں دو مرتبہ صابن سے صاف پانی سے نہائیں۔رات کو کولر چلا کر مت سوئیں۔