ضلعی انتظامیہ انسداد کانگو و ڈینگی کیلئے اقدامات پر عملدرآمد یقینی بنا رہی ہے ،ایڈیشنل ڈسٹرکٹ کلکٹر

رحیم یارخان۔30 اگست(اُردو پوائنٹ اخبارتازہ ترین - اے پی پی۔30 اگست۔2016ء) ایڈیشنل ڈسٹرکٹ کلکٹر رحیم یار خان جمیل احمد جمیل نے کہا ہے کہ ضلعی انتظامیہ انسداد کانگو اور ڈینگی کے لئے غیر معمولی اقدامات پر عملدرآمد یقینی بنا رہی ہے ۔ ضلع میں اس موذی مرض سے بچاؤ کے لئے نا صرف احتیاطی تدابیر پر عملدرآمد کیا جا رہا ہے بلکہ عوام کو آ گاہی فراہم کرنے کے لئے بھی موثر مہم چلائی جا رہی ہے۔

ان خیالات کا اظہار انہوں نے مشیر صحت خواجہ سلمان رفیق اور ایڈیشنل چیف سیکرٹری پنجاب کی زیر صدارت منعقدہ کانفرنس میں کیا۔انہوں نے بتایا کہ ڈی سی ا وکیپٹن(ر)محمد ظفر اقبال نے قربانی کے جانوروں کی شہری حدود میں خرید و فروخت پرپابندی عائد کر دی ہے جس پر سختی سے عملدرآمد کرایا جا رہا ہے۔

(جاری ہے)

ضلعی انتظامیہ کی جانب سے تمام تحصیلوں میں عارضی منڈیوں کے قیام کے لئے اقدامات مکمل کر لئے گئے ہیں جبکہ سندھ، بلوچستان بارڈر پر ہونے کے باعث ضلع کی حدود میں آنے والی مویشیوں سے بھری تمام گاڑیوں میں حفاظتی سپرے کیا جا رہا ہے۔

انہوں نے کہا کہ محکمہ لائیو سٹا ک کی ٹیمیں ضلع کے تمام داخلی و خارجی راستوں پر پولیس کے ہمراہ حفاظتی اقدامات کر رہی ہیں۔انہوں نے کہا کہ ضلع بھر میں تمام ایسے مقامات جہاں پر ڈینگی لاروا کی افزائش ممکن ہے ان کی مسلسل مانیٹرنگ اور سپرے کیا جا رہا ہے۔انہوں نے کہا کہ شیخ زید ہسپتال سمیت تمام تحصیل ہیڈ کوارٹر ہسپتالوں میں ڈینگی اور کانگو سے متاثرہ مریضوں کو طبی سہولیات کی فراہمی کے لئے علیحدہ وارڈز اور تربیت یافتہ سٹاف موجود ہے۔اجلاس میں ای ڈی ا وہیلتھ ڈاکٹر مخدوم بشارت حسین ہاشمی، ایم ایس شیخ زید ہسپتال ڈاکٹر تسنیم کامران، ڈی او لائیو سٹاک ڈاکٹر سبطین شاہ سمیت دیگرنے شرکت کی۔