تمام جمہوری قوتیں پاکستان کو بچانے کیلئے حکومت کا ساتھ دیں ‘ پاکستان کو دہشتگردی کے کینسر سے پاک کریں گے‘ آصف زرداری،ایسی بزدلانہ کارروائیوں سے حوصلے پست نہیں ہونگے ‘ ایک دن یہ بزدل عوام کے سامنے جھکیں گے ‘ قوم سے مختصر خطاب

اسلام آباد( اُردو پوائنٹ اخبار تازہ ترین۔20ستمبر۔2008ء) صدر مملکت آصف علی زرداری نے دہشتگردوں کے عزائم کو ناکام بنانے کے عزم کا اظہار کرتے ہوئے تمام جمہوری قوتوں سے اپیل کی ہے کہ وہ پاکستان کو بچانے کیلئے حکومت کا ساتھ دیں ‘ دہشتگردی ایک وباء اور کینسر کی شکل اختیار کر چکی لیکن میں وعدہ کرتا ہوں کہ حکومت حوصلے کسی بھی ایسے حرکت سے پست نہیں ہونگے بلکہ پاکستان کو اس کینسر سے نجات دلائینگے ‘ شہید ہونیوالوں کے ورثاء کو یقین دلاتا ہوں کہ حکومت انکی ہر ممکن مدد اور کفالت کرے گی ۔

وہ گزشتہ رات قوم سے مختصر خطاب کر رہے تھے ۔ آصف علی زرداری نے کہا کہ اس خوشی کے موقع پر جب پوری قوم جمہوریت مکمل ہونے کا جشن منا رہی تھی ایک بہت خوفناک اور بزدلانہ حملے نے یہ خوشیاں غم میں بدل دیں‘ میں جانتا ہوں کہ اپنوں کے بچھڑنے کا کیا غم ہوتا ہے کیونکہ پیپلز پارٹی نے بہت سے دوستوں کو اپنے ہاتھوں سے دفن کیا اور میں اپنے بیوی کو بھی اپنے ہاتھوں سے دفن کر چکا ہوں میرا دل خون کے آنسو روتا ہے ‘ جن ماؤں بہنوں کے بیٹے ‘ بھائی شہید ہوئے ہیں وہ دل پر پتھر رکھیں اوردرد کو اپنی طاقت بنائیں ‘ دہشتگردی ایک کینسر ہے جسے ہم ختم کر کے رہیں گے ہم بزدلوں سے نہیں ڈریں گے ‘پاکستان ایک اٹل اور نڈر قوم ہے ‘ہم پاکستانی اپنی جان کو اللہ کی امانت سمجھتے ہیں ہم موت سے نہیں ڈرتے موت ایک دن آنی ہے ‘پاکستان کو اس کینسر سے پاک کر کے رہیں گے او روہ دن ضرور آئیگا جب یہ دہشتگرد آپ کے سامنے جھکیں گے ۔

(جاری ہے)

انہوں نے کہا کہ پاکستان ہمارا ہم اسے بچائیں گے ۔ انہوں نے مزید کہا کہ رمضان المبارک کے مقدس مہینے میں ا سطرح کی کارروائی کوئی مسلمان کام نہیں کر سکتا ۔انہوں نے کہا کہ میں تمام جمہوری قوتوں سے اپیل کرتا ہوں وہ پاکستان کو بچائیں اور ظالموں کو کڑی سے کڑی سزا ددیں ۔