امیتابھ بچن کوصحت مند ہونے کے بعد ہسپتال سے ڈسچارج کر دیا گیا

جمعہ 17 اکتوبر 2008 12:57

ممبئی (اردوپوائنٹ اخبا ر تازہ ترین17 اکتوبر2008 )امیتابھ بچن کوصحت مند ہونے کے بعد ہسپتال سے ڈسچارج کر دیا گیا۔ ہسپتال سے انہیں گھر لے جانے کیلئے ان کے بیٹے ابھیشیک پہنچے تھے۔ہسپتال کے دروازے سے نکل کر امیتابھ نے باہر موجود میڈیا کے نمائندوں کو ہاتھ ہلا کر جواب دیا۔ امیتابھ بچن کو ایک ہفتہ قبل ان کے چھیاسٹھویں سالگرہ کے روز ہی پیٹ میں شدید درد کی شکایت کے پہلے ناناوتی اور پھر لیلا وتی ہسپتال میں داخل کیا گیا تھا۔

ہسپتال کے ڈاکٹروں کے مطابق انہیں incisional hernia کی شکایت تھی جسے دواوٴں کے ذریعہ ٹھیک کیا گیا۔امیتابھ کی صحت کے لیے ان کے پرستاروں نے مندروں میں دعائیں کی تھیں اور بالی وڈ کے ان کے دوستوں ان سے عیادت کے لیے ہسپتال پہنچے تھے۔ ن کی اداکارہ بہو ایشوریہ رائے نے بھی اپنی تمام فلموں کی شوٹنگ منسوخ کر دی تھی۔

(جاری ہے)

اس وقت وہ جنوبی ہند کے ہیرو رجنی کانت کے ساتھ ’روبوٹ‘ کی شوٹنگ سے کچھ دنوں کی رخصت پر ممبئی آئی تھیں۔

اس کے بعد ان کے اداکار شوہر ابھیشیک بچن کو کیرل میں منی رتنم کی آنے والی فلم ’راون‘ کی شوٹنگ کے لیے جانا تھا۔ دونوں نے کچھ دنوں کے لیے شوٹنگ منسوخ کروا دی ہے۔ بیماری سے پہلے امیتابھ اس وقت فلم ’تین پتی‘ کی شوٹنگ کر رہے تھے۔ ایک دن سالگرہ کے لیے رخصت کے بعد انہیں اس فلم کی شوٹنگ کرنی تھی لیکن اب ڈاکٹروں نے امیتابھ کو گھر پر بھی آرام کرنے کا مشورہ دیا ہے اس لیے ابھی وہ کئی ہفتوں تک شوٹنگ نہیں کر سکیں گے۔ امیتابھ پر اس وقت انڈسٹری کے سو کروڑ روپے لگے ہوئے ہیں۔