غیر ملکی طبی ماہرین پاکستان کے دیہی علاقوں میں جا کر کام کریں تو لوگوں کو بہت ریلیف ملے گا، گورنر سندھ

منگل 2 دسمبر 2008 21:13

کراچی (اردوپوائنٹ اخبا ر تازہ ترین02دسمبر2008 ) گورنر سندھ ڈاکٹر عشرت العباد خان نے کہا ہے کہ اگر غیر ملکی طبی ماہرین پاکستان کے دیہی علاقوں میں جا کر کام کریں تو وہاں کے غریب لوگوں کو بہت ریلیف ملے گا۔ کیونکہ ایسے علاقوں میں کام کرنے کی بہت زیادہ ضرورت ہے۔ یہ بات انہوں نے منگل کو آئی بینک سوسائٹی کے وفد سے گورنر ہاؤس میں بات چیت کرتے ہوئے کہی۔

جس نے کراچی میں جرمن قونصلر کی قیادت میں ان سے ملاقات کی۔ وفد میں شامل جرمنی سے آئے ہوئے ڈاکٹر PUTHEARN اور ان کی اہلیہ ایک ماہ کیلئے پاکستان میں بلا معاوضہ خدمات انجام دیں گے۔ وہ بہنے والی آنکھوں کو کارآمد بنانے میں مہارت رکھتے ہیں۔ آئی بینک سوسائٹی 38 سالوں سے کام کررہی ہے اور 15 ہزار کامیاب آپریشن کرچکی ہے۔ اس میں مزید ڈینٹل پونٹ کھولا گیا ہے اور ہزاروں افراد کو اس سے سہولت حاصل ہوچکی ہے۔

(جاری ہے)

سوسائٹی میں 36 ہزار افراد رجسٹرڈ ہیں۔ جس میں تمام شعبوں کی نمائندگی موجود ہے۔ جن میں کیمیکل، کمپیوٹر، سول انجینئرنگ کے علاوہ تمام شعبوں کے لوگ موجود ہیں اور وہ دن رات کوششیں کررہے ہیں۔ ڈاکٹر نے کراچی کے لوگوں کی میزبانی کے حوالے سے کہا کہ میں نے دنیا کے بہت سے شہروں کا دورہ کیا ہے لیکن کراچی جیسا شہر اور میزبانی مجھے دنیا کے کسی حصے میں دیکھنے کو نہیں ملی۔ گورنر سندھ نے تمام شعبوں میں تعاون بڑھانے کی ضرورت پر زور دیا۔ وفد میں قاضی ساجد، سیکریٹری جنرل آئی بینک سوسائٹی، ڈاکٹر اختر جمال، جہانزیب فقل، اے مجید بھی بھی شامل تھے۔

متعلقہ عنوان :